ओमान जान लागेको नेपाली राष्ट्रिय क्रिकेट टोलीलाई बिदाइ गरिएको छ । 

आईसीसी टी–२० विश्वकप ग्लोबल क्वालिफायरमा सहभागिता जनाउन ओमान जान लागेको नेपाली टोलीलाई मंगलवार बिदाइ गरिएको हो । 

युवा तथा खेलकुद मन्त्री महेश्वर गहतराज (अथक) ले खेलाडीहरुलाई भर्चुअल माध्यमबाट बिदाइ गरेका हुन् । 

विश्वकप छनोटका लागि हुने खेलका लागि नेपाली टोली मंगलवार राति साढे ८ बजे ओमान प्रस्थान गर्ने तालिका छ । 

ग्लोबल छनोटका लागि नेपालसहित आयोजक ओमान, फिलिपिन्स, क्यानाडा, यूएई, बहराइन, आयरल्यान्ड र जर्मनीबीच खेल हुने भएको छ । फेब्रुअरी १८ देखि २४ तारिखसम्म हुने छनौट खेलअन्तर्गत समूह ‘ए’ मा नेपाल, क्यानाडा, फिलिपिन्स र ओमान छन् भने समूह ‘बी’ मा यूएई, बहराइन, आयरल्यान्ड र जर्मनी रहेका छन् ।

छनोटअघि नेपालले ओमानमा चारदेशीय टी–२० सिरिज खेल्ने तालिकासमेत रहेको नेपाल क्रिकेट संघ (क्यान) का अध्यक्ष चतुरबहादुर चन्दले जानकारी दिए । सिरिजमा नेपालसहित आयरल्यान्ड, यूएई र ओमान छन् ।