स्थानीय निर्वाचन- एक करोड ८६ लाख मतदाता हुने आयोगको अनुमान

आगामी वैशाख ३० गते हुने स्थानीय तहको निर्वाचनमा एक करोड ८६ लाख सम्म मतदाता पुग्न सक्ने निर्वाचन आयोगले अनुमान गरेको छ । 

निर्वाचन आयोगका प्रवक्ता शालिग्राम शर्मा पौडेलका अनुसार २१ देखि २२ लाखसम्म मतदाताको संख्यामा वृद्धि भएकाले स्थानीय तहको निर्वाचनमा सो संख्यामा मतदाता पुग्ने अनुमान गरिएको हो । 

२०७४ सालमा प्रदेश सभा र प्रतिनिधि सभाको निर्वाचनमा एक करोड ५४ लाख मतदाता थिए । 

२०७७ पुस ५ सम्म मतदाता नामावली संकलनका लागि विशेष अभियान सञ्चालन गरेपछि मतदाता संख्या एक करोड ६२ लाख ४३ हजार पुगेको थियो । 

'अहिले २१ देखि २२ लाख सम्म मतदाता थपिएको छ, त्यसआधारमा यस पटक स्थानीय तहको निर्वाचनमा एक करोड ८६ लाखसम्म मतदाता पुग्ने आयोगको अनुमान छ,' पौडेलले लोकान्तरसँग भने ।