बैंकहरूले ब्याजदर १ प्रतिशत बढाउँदा शेयर बजारका लगानीकर्ता आत्तिएका कारण नेप्से परिसूचक १००.६७ अंकले घटेको छ । 

साताको पहिलो दिन आइतवार शेयर बजार एकैदिन ३.५९ प्रतिशतले घटेर २७००.८९ अंकमा झरेको छ । 

दुई साता अगाडि मात्रै २९ सय अंकमा पुगेको नेप्से परिसूचक आइतवारसम्ममा करीब २०० अंकले घटिसकेको छ । 

बजार घटेको दिन २२७ कम्पनीको एक करोड १६ लाख ६१ हजार कित्ता शेयर ८१ हजार ८३७ पटक किनबेच भएको छ । यस्तो किनबेचबाट ५ अर्ब ९७ करोडको कारोबार भएको छ । 

बजार घटेको दिन नबिल समृद्धि फण्डले १.९२ प्रतिशत, सनराइज ब्लुचिप फण्डको १.१० प्रतिशतले, नबिल ब्यालेन्स फण्डको ०.७३ प्रतिशत, मेगा म्युचुअल फण्डको ०.५५ प्रतिशत, लक्ष्मी उन्नति कोषको ०.१९ प्रतिशतले शेयर मूल्य बढेको छ । 

बजार घटेका कारण नेप्सेमा सूचीकृत अधिकांश कम्पनीका लगानीकर्ताले गुमाएका छन् । आइतवार सबैभन्दा बढी गुमाउनेमा माथिल्लो तामाकोशी हाइड्रोपावरका लगानीकर्ताले ८.३७, नारायणी डेभलपमेन्ट बैंकले ८.२६ प्रतिशतले गुमाएका छन् ।

यसका साथै शिव श्री हाइड्रोपावर, विन नेपाल लघुवित्त वित्तीय संस्था, बुद्धभूमि नेपाल हाइड्रोपावरका लगानीकर्ताले ७ प्रतिशतभन्दा बढीले गुमाएका छन् । 

आइतवार सबै भन्दा बढी शेयर कारोबार माथिल्लो तामाकोशीको ३२ करोड  ८४ लाख रूपैयाँको भएको छ । आज सबैभन्दा बढी कित्ता किनबेच हुनेमा भने नेपाल पूर्वाधार विकास बैंकको ६ लाख ८५ हजार ५३ कित्ता शेयरको कारोबार भएको छ । 

बजार घटेका कारण लगानी समूहको सूचक सबैभन्दा बढी ५.०३ प्रतिशतले घटेको छ । बैंकिङ समूह, होटल, विकास बैक, जलविद्युत्, फाइनान्स, निर्जीवन बीमा, उत्पादन, माइक्रोफइनान्स, बीमा, म्युचुअल फण्डसहितका सबै समूहको सूचक घटेको छ । 

‘लगानीकर्तामा धैर्यता भएन, ओभर प्यानिक भयो’

शेयर लगानीकर्ता तथा नेपाल इन्भेटर्स फोरमका अध्यक्ष छोटेलाल रौनियारका अनुसार बैैंकले १ प्रतिशतले ब्याजदर बढाउँदैमा साना लगानीकर्ता ‘ओभर प्यानिक’ भएको देखियो । 

यसले साना लगानीकर्तामा धैर्यता नहुने र बजार बढ्दा किन्ने तथा घट्दा तुरुन्तै बेचेर बाहिरिहाल्ने भन्ने उल्टो अभ्यास भइरहेको पनि रौनियारले बताए । 

रौनियारले भने अहिले शेयर बजार घट्नुपर्ने अन्य कुनै कारण छैन । राजनीतिक कारणले शेयर बजार नघटेको र एमसीसीको कारण भने त्यस्तो ठूलो प्रभाव नहुने बुझाइ पनि उनको छ । 

एमसीसी पास भए पनि शेयर बजारलाई राम्रो गर्ने र पास भए पनि नेपालमा अमेरिकी सेना आउने भन्ने हल्ला मात्रै भएको हुँदा लगानीकर्ता आत्तिनुपर्ने कुनै कारण नभएको तर्क पनि रौनियारको छ । 

उनले भने, ‘नयाँ लगानीकर्ता आउने आत्तिने र मात्तिने अभ्यास नै गलत हुँदा बजारमा असर परेको देखिएको मात्रै हो ।’ 

दुई महिना अगाडि २३ सयमा झरेको बजार पुनः २९ सय पुगिसकेको थियो ।

रौनियारका अनुसार घटेको बेला किनेर मौका छोप्नेले बोनस पाए भने २९ सय पुगेको बेला लाभ पनि लिए । उनका अनुसार आत्तिने लगानीकर्ताले न बोनस पाए न उच्च बिन्दुमा पुगेका बेला लाभ । 

त्यसैले अहिले सय–५० अंकमा शेयर घट्दैमा बेचेर भागिहाल्नुपर्ने होइन । धैर्यता गर्ने र आत्मविश्वास बनाएर बस्ने लगानीकर्ताले भोलिका दिन बजार बढ्दा लाभ पाउने बुझाइ शेयर लगानीकर्ता रौनियारको भनाइ छ ।