दलहरूको विरोधका बीच प्रतिनिधि सभामा अमेरिकी आर्थिक सहयोग कार्यक्रम मिलेनियम च्यालेन्ज कम्प्याक्ट (एमसीसी) संसदमा अगाडि बढेको छ । 

नेकपा एमालेको विरोधका बाबजुद प्रतिनिधि सभाको बैठकमा सभामुख अग्नि सापकोटाले दलका नेताहरूलाई बोल्नका लागि समय दिएका छन् । 

संसद्को कार्यसूचीमा एमसीसीको एजेण्डा समावेश भएपछि नेकपा एमालेका भीम रावल र माओवादी केन्द्रका देव गुरुङले आपत्ति जनाए । रावलले अमेरिकाको धम्कीका सामु सरकार झुकेको आरोप लगाए ।

नेमकिपाका प्रेम सुवालले एमसीसीमा हस्ताक्षर गर्ने तत्कालीन अर्थमन्त्री ज्ञानेन्द्रबहादुर कार्कीसँग संसदले स्पष्टीकरण लिनुपर्ने बताए । 

सत्ता गठबन्धनमा सहमति भएपछि आइतवारको कार्यसूचीमा एमसीसी समावेश भएको थियो ।