नेपाली कांग्रेसका महामन्त्री गगन थापाले एमसीसीमा संसदमा मतदान हुने बेलासम्म अहिले विरोधमा रहेका दलहरू एमसीसीको पक्षमा आइसक्ने दाबी गरेका छन् । 

संसद बैठकमा सहभागी भएर फर्किने क्रममा संक्षिप्त प्रतिक्रिया दिँदै आगामी बैठकमा एमसीसी अनुमोदन हुने विश्वास व्यक्त गरेका थापाले भने, ‘टेबुल भएर छलफल भएर पास गर्ने बेलासम्म अहिले विरोध गर्ने दलहरू मतदान गर्ने अवस्थामा आइपुग्छन् ।’

‘नाराबाजीका बीचमा पनि छलफल हुन्छ र मतदानमा जान्छ,’ थापाले भने, ‘नाराबाजीका बीच पनि छलफल हुँदोरहेछ भन्ने आजको बैठकले प्रमाणित गरेको छ । संसद अवरोध गरिरहेको एमालेका नेताहरू पनि बैठकमा छलफलमा भाग लिएका छन् ।’ 

कम्युनिष्ट पार्टीका नेताले आफैंले तयार गरेको प्रस्ताव अहिले संसदमा प्रस्तुत भएपछि अब भने 'डबल स्ट्यान्डर्ड' छाड्नुपर्ने उनले बताए । 

‘आधाले विरोध गरेजस्तो गर्ने, आधाले समर्थन गर्ने जस्तो गर्न आवश्यक छैन । अब डबल स्ट्यान्डर्ड छाड्नुपर्छ,’ उनले भने ।

एमसीसी अनुमोदन हुँदा गठबन्धन के हुन्छ भन्ने प्रश्नमा थापाले भने, ‘आफ्नो कर्तव्य पूरा गर्ने हो । त्यसको परिणाममा गठबन्धन रहेन भने रहेन । तर, हामी त्यस्तो अवस्था नआओस् भन्ने चाहन्छौं ।’