शेयर बजारको मापक सूचक नेप्से साताको दोस्रो दिन सोमवार ४३.१० अंकले घटेको छ । नेप्से परिसूचक १.६२ प्रतिशतले घटेर बजार २६१०.६० बिन्दुमा आइपुगेको छ ।

बजार घटेको दिन २२७ कम्पनीको ७८ लाख ३४ हजार कित्ता शेयरको ५४ हजार पटक कारोबार भएको छ । यसबाट कुल ३ अर्ब ६६ करोड रूपैयाँको कारोबार भएको छ । 

सोमवार बजार घट्दा सबै उपसमूहका लगानीकर्ताले गुमाउँदा पनि एनआईसी एशिया डिबेन्चर, सनराइज ब्लुचिप, लक्ष्मी इक्विटी, तारागाउँ रिजेन्सी होटल, सानिमा जनरल इस्योरेन्ससहितका लगानीकर्ताले ०.८७ देखि २ प्रतिशतसम्मले कमाएका छन् ।

तनहुँ पावर कम्पनी र सामलिङ पावर कम्पनीको शेयर मूल्यमा भने नकारात्मक सर्किट लागेको छ । यी दुवैै कम्पनीका लगानीकर्ताले १०/१० प्रतिशतका दरले गुमाएका छन् । 

सोमवार गुमाउनेमा दीव्यश्वरी हाइड्रोपावर, मैलुङ खोला जलविद्युत् कम्पनी, न्यादी हाइड्रोपावर कम्पनीसहितका लगानीकर्ताले ६.६७ देखि ८.५५ प्रतिशतसम्मले गुमाएका छन् । 

सोमवार सबैभन्दा बढी कारोबार अपी पावर कम्पनीको भएको छ । यसको एकैदिन १६ करोड रूपैयाँको कारोबार भएको छ । यो दिन सबैभन्दा बढी शेयरको कारोबार भने नेशनल हाइड्रोपावरको भएको छ । यसको ३ लाख ३८ हजार कित्ता शेयरको १ हजार ९९३ पटक करोबार भएको छ ।