ब्रोकर डाटा सेन्टरमा समस्या आउँदा सोमवार दिनभर शेयर कारोबार ठप्प भएको छ । 

नेपाल स्टक एक्सचेन्ज (नेप्से)मा सूचीकृत कम्पनीको शेयर कारोबार सोमवार १२ः५३ बजेपछि ठप्प भएको हो । 

बजार खुलेको २ घण्टा नपुग्दै ब्रोकर डाटा सेन्टरमा समस्या देखिएको थियो । 

कारोबार बन्द हुने समय (३ बजे)सम्म पनि डाटा सेन्टरमा आएको समस्या हल भएको छैन । 

नेप्सेको सर्भर ठीक भए पनि ब्रोकर कम्पनीहरूको ट्रेड म्यानेजमेन्ट सिस्टम (टीएमएस)मा समस्या भएकाले कारोबार हुन नसकेको नेप्सेका प्रवक्ता मुराहरि पराजुलीले जानकारी दिए । 

ब्रोकरको सिस्टम बनेमा र समय भए कारोबार समय थप हुन पनि सक्ने नेप्सेको भनाइ छ । अहिलेसम्म ब्रोकरको सिस्टम नबनेकाले नेप्सेको सीईओ तहबाट निर्णय भने भएको छैन । 

अन्य समयमा भने यसरी कारोबार समय अवरुद्ध हुँदा नेप्सेकै सीईओ तहबाट निर्णय भएर कारोबार समय थप हुने गरेको थियो । 

आजको हकमा भने अहिले नै के गर्ने भन्ने विषयमा निर्णय लिन नसकिएको नेप्सेले जनाएको छ । 

टीएमएसमा आएको समस्याका कारण कारोबार बन्द हुनुअघि करीब २ घण्टासम्मको अवधिमा बजार ०.१५ अंकले मात्रै बढेको थियो । उक्त अवधिमा जम्मा १ अर्ब ३४ करोड रूपैयाँको कारोबार भएपछि सिस्टम बन्द भएको छ ।