वाणिज्य बैंकहरूमा फागुन महिनामा करीब २२ अर्ब रूपैयाँ निक्षेप थपिएको छ । 

यो अवधिमा कर्जा प्रवाह भने निक्षेपको तुलनामा ५ अर्बले घटेको छ । फागुन महिनामा वाणिज्य बैंकहरूले १७ अर्ब रूपैयाँले कर्जा बढाएका छन् ।  

वाणिज्य बैंकहरूमा चालू आर्थिक वर्षदेखि निक्षेप कम र कर्जा मात्रै बढेको भए पनि फागुनमा भने कर्जा प्रवाह कम भएको छ ।

बैंकहरूले फागुन लागेपछि कर्जा विस्तार कम गर्दै गएका कारण निक्षेप बढ्दा कर्जा कम देखिएको हो ।  

बैंकर्स संघले उपलब्ध गराएको तथ्यांकअनुसार फागुनमा २१ अर्ब ६६ करोड रूपैयाँ निक्षेप संकलन भएको छ । फागुन महिनामा सबैभन्दा बढी निक्षेप संकलन गर्नेमा माछापुच्छ्रे बैंक रहेको छ । यो बैंकले एक महिनामा ४ अर्ब ८१ करोड रूपैयाँ निक्षेप संकलन गरेको छ । 

फागुन महिनामा ७ वटा वाणिज्य बैंकहरूको निक्षेप संकलन अघिल्लो महिनाको तुलनामा भने घटेको छ । 

चालू आर्थिक वर्षको फागुनसम्ममा बैंकहरूको निक्षेप संकलन १ खर्ब ३१ अर्ब रूपैयाँ हुन पुगेको छ । यो अवधिसम्ममा सबैभन्दा बढी निक्षेप संकलन नबिल बैंकले २१ अर्ब ६७ करोड रूपैयाँ गरेको छ । 

फागुनमा सबैभन्दा बढी कर्जा विस्तार गर्नेमा भने राष्ट्रिय वाणिज्य बैंकको ७ अर्ब ७ करोड रूपैयाँ रहेको छ । यो बैंकले उक्त महिना संकलन गरेको निक्षेप भने ३ अर्ब ३ करोड रूपैयाँ मात्रै छ । 

फागुनमा ९ वटा बैंकहरूको निक्षेप संकलन घटेको छ । उक्त महिना निक्षेप संकलन घटेसँगै १० वटा वाणिज्य बैंकहरूको भने कर्जा विस्तार पनि अघिल्लो महिनाको तुलनामा घटेको छ । 

बैंकहरूमा निक्षेप कम संकलन भएका कारण कर्जा विस्तार पनि घटेको बैंकर्स संघले जानकारी दिएको  छ ।