चितवनमा सत्ता गठबन्धनबीच चुनावी तालमेल गर्ने निर्णय भएको छ । 

नेपाली कांग्रेस, नेकपा माओवादी केन्द्र, नेकपा (एस), जसपा र राजमोबीच चितवनका ७ वटै स्थानीय तह र जिल्ला समन्वय समितिमा तालमेल गर्ने सहमति भएको हो । 

कांग्रेसका चितवन सभापति राजेश्वर खनालको अध्यक्षतामा भएको बैठकले चुनावी तालमेलका लागि संयुक्त संयन्त्र निर्माण गरेर छलफल प्रक्रिया अगाडि बढाउने निर्णय पनि गरेको छ । संयन्त्रको संयोजन भने कांग्रेसको पालिका सभापतिले गर्नेछन् । 

गठबन्धन सहभागी दलहरूबीच गठबन्धनको मर्म र भावनाअनुरुप एकआपसमा सम्मान र हार्दिकताको विकास गर्दै संयुक्त रुपमा आसन्न स्थानीय तहको निर्वाचनमा सहभागी हुने, दलगत वस्तुस्थितिबारे प्रतिवेदन तयार गर्न प्रत्येक दलबाट एक/एक जना प्रतिनिधि रहने गरी कार्यदल गठन गर्ने पनि निर्णय गरिएको विज्ञप्तिमा उल्लेख छ ।