नाडा अटोमोबाइल्स एसोसियसन अफ नेपाल (नाडा)ले एलसी खोल्ने कार्यलाई निरन्तरता दिन प्रधानमन्त्री शेरबहादुर देउवासँग माग गरेको छ ।

शुक्रवार बिहान प्रधानमन्त्री देउवालाई भेट्दै नाडाले एलसी खोल्न माग गरेको हो । 

नाडाका अध्यक्ष ध्रुव थापाको नेतृत्वमा गएको चार सदस्यीय प्रतिनिधि मण्डलले प्रधानमन्त्री देउवालाई भेट गरी यातायात क्षेत्रलाई सरकारले वेवास्ता गर्न खोजेको गुनासो गरेको हो । 

भेटघाटमा अध्यक्ष थापाले नेपालको अटोमोवाइलक्षेत्रलाई नजरअन्दाज गर्दै बैङ्क जस्ता वित्तिय निकायहरुले सम्पूर्ण सवारी तथा ढुवानीका साधन लगायत त्यसमा प्रयोग हुने स्पेयर पार्टसको आयातका लागी प्रतितपत्र (एलसी) खोल्नेबारे व्यवसायीहरुलाई कुनै समय नै नदिई अप्रत्यासित रुपमा बन्द गरिएको सम्बन्धमा गुनासो गरे । 

भेटका क्रममा २ खर्ब भन्दा बढीको लगानी रहेको, हरेक बर्ष १ खर्ब ५० अर्ब भन्दा बढी राजश्वमा योगदान पुर्‍याउँदै आएको र देशको प्रत्यक्ष रोजगारीमा ५० हजार भन्दा बढीलाई अवसर दिदै आएको अटोमोबाइल्स क्षेत्रलाई सरकारले बेवास्ता गर्न नहुने उनले बताए । 

एलसी तत्काल खोल्नका निम्ति उनले आग्रह समेत गरे । 

। सो छलफलमा महासचिव सुरेन्द्रकुमार उप्रेतीले अटोमोवाइल क्षेत्रको ठूलो योगदानका बावजुद पनि सरकारका नीतिहरु हमेसा अटोमोवाइल व्यवसायीहरुलाई निरुत्साहित गर्ने खालको हुने गरेको गुनासो गरे ।

उक्त छलफलको क्रममा प्रधानमन्त्रीले नाडाको सुझावहरूलाई सकारात्मक रुपमा लिदै सवारी साधनहरुको आयातका लागी प्रतितपत्र (एलसी) खोल्न बन्द गरिएको बारे आवश्यक जानकारी लिई सम्बन्धित निकायमा निर्देशन दिइने आश्वासन समेत दिए । 

सो छलफलमा कोषाध्यक्ष मिलनबाबु मल्ल तथा केन्द्रीय कार्य समिति सदस्य निराकार श्रेष्ठ समेतको उपस्थिति रहेको थियो ।