रुसले युक्रेनमा आक्रमण गरेदेखि नै अमेरिकाका सैन्य अधिकारीहरूले रुसी समकक्षीसँग संवाद गर्न नपाएको अमेरिकाका रक्षामन्त्री लोयड अस्टिनले बताएका छन् । 

बिहीवार सिनेटको आर्म्ड सर्भिसेज कमिटीको सुनुवाइका क्रममा उनले यस्तो टिप्पणी गरेका हुन् । 

यस्तो परिस्थितिले आफूलाई चिन्तित बनाएको बताउँदै उनले थपे, ‘तर हामी उनीहरूसँग संवाद गर्ने प्रयासमा छौं । रुसको सैन्य नेतृत्वसँग कुरा गर्ने क्षमता हामीसँग हुनुपर्छ ।’

‘जनरल मार्क मिल्ली र मैले रुसमा रहेका समकक्षीहरूलाई सम्पर्कको कोशिश धेरैपटक गरेका छौं । पछिल्लोपटक फेब्रुअरीको मध्यमा हाम्रो कुराकानी भएको थियो,’ अस्टिनले सिनेटरहरूलाई बताए । 

‘तर हामी सफल हुन सकेका छैनौं किनकि रुसीहरूले प्रतिक्रिया जनाएका छैनन्,’ उनले थपे । 

रक्षा मन्त्रालयले इतिहासकै सबभन्दा ठूलो बजेट मागेपछि त्यस विषयमा उठेको प्रश्नको जवाफ माग्न अस्टिनलाई सिनेटमा बोलाइएको थियो ।