पाँच दलीय गठबन्धनले स्थानीय तहमा चुनावी तालमेल गरी उम्मेदवार छनौट गर्ने अधिकार स्थानीय तहको राजनीतिक संयन्त्रलाई नै दिने सहमति गरेको छ । 

आइतबार प्रधानमन्त्री निवास बालुवाटारमा बसेको निर्वाचन परिचालन तथा अनुगमन समितिको बैठकले स्थानीय तहमा बनेको पाँच दलीय राजनीतिक संयन्त्रलाई नै उम्मेदवार चयनको जिम्मा दिने सहमती गरेको बैठकमा सहभागी एक नेताले बताए । 

पाँच दलीय गठबन्धनले कांग्रेस नेता रामचन्द्र पौडलेको नेतृत्वमा निर्वाचन परिचालन तथा अनुगमन समिति बनाएको थियो । 

स्थानीय तहमा कुन स्थानीय तहको प्रमुख, उपप्रमुख र वडाको नेतृत्व कसले लिने भन्ने सहमति गरेर रिपोर्ट पठाउन लगाउने र त्यसैमाथि छलफल गरेर गठबन्धनमा निर्णय गर्ने प्रारम्भिक सहमती भएको ती नेताले बताए । 

समितिको बैठक भोलि बिहान ९ बजे फेरि बस्ने तय भएको छ । उक्त बैठकपछि पाँच दलीय गठबन्धनकोतर्फबाट संयुक्त अपिल पनि जारी गर्ने तयारी गरिएको छ ।