कंगोमा निधन भएका नेपाली शान्ति सैनिक प्युठ अनिल गुरुङलाई नेपाली सेनाले बुधवार श्रद्धाञ्जली तथा अन्तिम सम्मान अर्पण गरेको छ । छाउनीस्थित वीरेन्द्र अस्पतालमा श्रद्धाञ्जली र सम्मान अर्पण कार्यक्रम गरिएको हो । 

प्रधानसेनापति प्रभुराम शर्माले सम्मानस्वरुप गुरुङको पार्थीव शरीरमा नेपाली सेनाको झण्डा ओढाई श्रद्धाञ्जली स्वरुप फूलमाला अर्पण गरेका थिए । साथै रक्षा सचिव किरणराज शर्माले पनि फूलमाला चढाएका थिए भने संयुक्त राष्ट्र संघको तर्फबाट नेपालका लागि आवासीय संयोजक रिचर्ड हावर्डले यूएनको झण्डा ओढाएर सम्मान प्रकट गरेको नेपाली सेनाले जनाएको छ । 

साथै नेपाली सेनाको टुकडीले अन्तिम सम्मानस्वरुप सलामी अर्पण गरेको थियो । सोही कार्यक्रममा प्रधानसेनापति शर्माले मोनुस्को मिसनका फोर्स कमाण्डरले पठाएको समवेदना पत्र र अन्तिम दाहसंस्कारका लागि सेनाबाट प्रदान हुने रकम मृतकका परिवारजनलाई हस्तान्तरण गरेका थिए । 

बुधवार नै गुरुङको पार्थीव शरीरलाई नेपाली सेनाको हेलिकप्टरबाट सुर्खेत लगिएको छ । त्यहाँ पनि नेपाली सेनाको स्थान विशेषमा तैनाथ युनिटले अन्तिम सलामी प्रदान गर्ने सेनाले जानकारी दिएको छ । 

चैत १२ गते कंगोमा सञ्चालन भएको अपरेशन ‘बाली’का क्रममा विद्रोहीको फायरबाट घाइते भएका गुरुङको उपचारका क्रममा बुनियाँस्थित अस्पतालमा मृत्यु भएको थियो । उनको शव मंगलवार नेपाल ल्याइएको थियो । 

सुर्खेतको गुर्भाकोट-१४ जहरेका गुरुङ क्यूआरएफ कम्पनी पहिलो डफ्फा कंगोमा कार्यरत थिए ।