यसरी गरियो आईजीपी शैलेश थापा क्षेत्रीको बिदाइ [तस्वीरहरू]

३० वर्ष सेवा अवधि पूरा गरी आइतवारबाट सेवा निवृत्त हुन लागेका प्रहरी महानिरीक्षक शैलेश थापा क्षेत्रीलगायत प्रहरी अतिरिक्त महानिरीक्षकहरु, प्रहरी नायव महानिरीक्षकहरु तथा प्रहरी वरिष्ठ उपरीक्षकहरूलाई बिदाइ गरिएको छ । 

आइतवार प्रहरी प्रधान कार्यालयमा आयोजित विशेष समारोहबीच उनीहरूलाई नवनियुक्त प्रहरी महानिरीक्षक धीरजप्रताप सिंहले बिदाइ गरेका हुन् । 

समारोहलाई सम्बोधन गर्दै प्रहरी महानिरीक्षक थापाले आफ्नो नेतृत्व कार्यकालमा सहयोग पुर्‍याउने सबै सकल दर्जाका प्रहरी अधिकृत तथा जवानहरूप्रति आभार प्रकट गरे । साथै कोभिड-१९ को विषम परिस्थितिमा पनि आम नागरिकको सेवामा सदैव क्रियाशील रही गरेको उच्च कार्यसम्पादनको प्रशंसा पनि गरे । 

समारोहमा प्रहरी महानिरीक्षक थापाले आफ्नो कार्यकालमा सम्पादन भएका उल्लेखनीय कार्यहरू एवम् प्रहरी संगठनमा हाल सञ्चालनमा रहेका महत्वपूर्ण कार्यहरू समेटिएर तयार गरिएको कार्य सम्पादन प्रतिवेदन नवनियुक्त प्रहरी महानिरीक्षक धीरजप्रताप सिंहलाई हस्तान्तरण गरे । 

सिंहले सेवा निवृत्त हुन लागेका प्रहरी महानिरीक्षक थापालगायत वरिष्ठ प्रहरी अधिकृतहरूलाई कृतज्ञताको चिनो प्रदान गरेका थिए ।  

समारोहमा नेपाल प्रहरी श्रीमती संघकी अध्यक्ष सिर्जना थापालाई समेत बिदाइ गरियो । उनलाई कुसुमलता सिंहले सम्मान गरेकी थिइन् । 

प्रहरी महानिरीक्षक थापासँगै सेवा निवृत्त हुन लागेका प्रहरी वरिष्ठ अधिकृतहरुमा प्रहरी अतिरिक्त महानिरीक्षकहरू, प्रहरी नायव महानिरीक्षकहरू तथा प्रहरी वरिष्ठ उपरीक्षकहरू समेत गरी १९ जना छन् ।