गोरखाको भीमसेन थापा गाउँपालिका–२ ताराखसे मतदान केन्द्रमा गोली चलेको छ । नेपाली कांग्रेस र नेकपा माओवादी केन्द्रका कार्यकर्ताबीच भएको झडपलाई नियन्त्रणमा लिन प्रहरीले गोली चलाएको छ । प्रहरीको गोली लागेर मतदान केन्द्रमा खटिएकी स्वयंसेविका मनिषा थापा घाइते भएकी छन् ।

घाइते थापाको  तिघ्रामा गोली लागेको र उपचारका लागि हेलिकोप्टरबाट काठमाडौं ल्याउने तयारी भइरहेको भीमसेन थापा गाउँपालिकाका अध्यक्ष इश्वर पाण्डेले बताए ।

उनका अनुसार झडप भएपनि प्रहरीले तर्साउन निर्वाचनमा खटिएकै कर्मचारीलाई नै गोली हानेको छ । गोली चलेपछि निर्वाचनको काम रोकिएको छ ।

उक्त निर्वाचन केन्द्रमा लाइनमा बसेका र भोट हाल्न बाँकी ५०/६० जना मात्रै थिए । अब ती मतदातालाई पुनः भोट हाल्न लगाउने, पुन निर्वाचन गर्ने वा जति मत खसेको छ त्यसैलाई आधिकारीक मान्ने भन्ने विषयमा छलफल चलिरहेको पनि गाउँपालिका अध्यक्ष पाण्डेले बताए ।

गोरखाका एसपी केदार खनालले भने, ‘ माओवादी र कांग्रेस कार्यकर्ताहरु हानाहान गर्दै मतपेटिका राखेको कोठामै छिरे । झडपलाई नियन्त्रणमा लिन फायर खोल्दा थापाको खुट्टामा गोली लाग्न पुग्दा उनी घाइते भएका हुन् ।’ मतपेटिका भने सुरक्षित रहेको सहायक निर्वाचन अधिकृत अधिकारीले बताए ।