गृहमन्त्री बालकृष्ण खाणले ताप्लेजुङको मिक्वाखोला गाउँपालिका-२ का बिमल कार्कीको २०७९ वैशाख २८ गते राति खोक्लिङको दुङ्जामा भीरबाट लडेर मृत्यु भएको घटनाको छानबिन गर्ने बताएका छन् । 

एमाले नेता एवं ताप्लेजुङबाट प्रतिनिधि सभा सदस्य योगेश भट्टराईको नेतृत्वमा आएको प्रतिनिधि मण्डलसँग मंगलवार गृह मन्त्रालयमा कुराकानी गर्दै गृहमन्त्री खाणले छानबिनमा कोही दोषी देखिएमा कारबाही गर्ने प्रतिबद्धता जनाए । 

‘नागरिकको जीवनरक्षा गर्ने सरकारको दायित्व हो । ताप्लेजुङमा वैशाख २८ गते राति भएको घटनाको निष्पक्ष छानबिन हुन्छ,’ गृहमन्त्री खाणले भने,  ‘छानबिनका क्रममा कोही दोषी देखिए कानूनअनुसार कारबाही हुन्छ ।’

प्रतिनिधि मण्डलका तर्फबाट प्रतिनिधि सभा सदस्य एमाले नेता भट्टराईले कार्की मृत्युको घटनाको विषेशरूपमा शीघ्र अनुसन्धान गरी दोषीलाई कारबाही गर्न माग गरे । उनले घटनाबारे छानबिन गर्न माग गर्दै गृहमन्त्री खाणलाई लिखित पत्र पनि बुझाएका थिएनन् ।