कैलालीका पालिकामा स्थानीय तह निर्वाचनअन्तर्गत कार्यपालिका सदस्य चयनका लागि निर्वाचन प्रक्रिया शुरू भएका छन् ।

निर्वाचनका लागि पालिकामा मतदाता नामावली प्रकाशन, अन्तिम नामावली प्रकाशन, मनोनयन दर्ताजस्ता कार्य भएका छन् ।

निर्वाचन आयोगले १५ दिनभित्र कार्यपालिका सदस्यको निर्वाचन गरी सक्न निर्देशन दिएपछि निर्वाचन अधिकृतका कार्यालयले निर्वाचनका गतिविधि शुरू गरेका हुन् । 

कैलालीको टीकापुरमा ८ जना कार्यपालिका सदस्य चयन गर्न १८ गते निर्वाचन हुने भएको छ । टीकापुर नगरपालिका कार्यपालिका सदस्यका लागि ११ जनाको उम्मेदवारी परेको सहायक निर्वाचन अधिकृत लक्ष्मी ओडले जानकारी दिइन् । ‘३ पार्टीबाट ११ जनाको उम्मेदवारी परेको छ । अल्पसंख्यकमा कुनै पार्टीबाट उम्मेदवारी परेको छैन,’ ओडले भनिन्, ‘स्थानीय तहको निर्वाचनमा विजेता बनेका ५ जना र बाहिरबाट ३ जना हुने गरी हुने ८ जना कार्यपालिका सदस्य चुनिनेछन् ।’

कार्यपालिका सदस्यका लागि नागरिक उन्मुक्ति पार्टीबाट ५ जनाको उम्मेदवारी परेको छ । नागरिक उन्मुक्ति पार्टीले ३ महिला सदस्यका लागि कैलाशपति चौधरी, रुपमति डगौरा थारु र सरस्वती तिरुवा र २ दलित सदस्यका लागि दीपकबहादुर निसानी र मञ्जु विकलाई उम्मेदवार बनाएको छ ।

नेपाली कांग्रेसले २ महिला सदस्यमा टंक वली कार्की र राजारानी चौधरीको नाम दर्ता गरेको छ । दलित सदस्यमा रामबहादुर नगार्जीको उम्मेदवारी परेको छ । नेकपा माओवादी केन्द्रले २ दलित सदस्य दिलु कामी र चन्द्र नेपाली तथा १ महिला सदस्यमा लबरी चौधरीलाई उम्मेदवार बनाएको छ ।

जानकी गाउँपालिकामा पनि कार्यपालिका सदस्य चयनका लागि मतदाता नामावली प्रकाशन भएको छ । जानकीमा ६ जना कार्यपालिका सदस्य चयनका लागि १५ गते निर्वाचन गरिने निर्वाचन अधिकृतको कार्यालयका निर्वाचन अधिकृत विश्वदीप बेसारा बताउँछन् । ‘मतदाता नामावली प्रकाशन गरेका छौं,’ बेसारा भन्छन्, ‘अब दाबी विरोध, मनोनयन दर्तालगायका कार्य हुनेछन् । अनि १८ गते निर्वाचनको तयारी छ ।’

कैलालीको जोशीपुर गाउँपालिकामा पनि १८ गते निर्वाचन हुने निर्वाचन अधिकृत शिवराज भट्टले जानकारी दिए । भजनीमा कार्यपालिका सदस्य चयनका लागि १७ गते निर्वाचन हुने भएको छ । भजनीमा ८ सदस्य चयनका लागि १३ जनाको उम्मेदवारी परेको छ ।