काभ्रेको खानीखोला गाउँपालिकाले आइतबार सार्वजनिक बिदा नदिने भएको छ । नेपाल सरकारले जेठ १ गतेबाट शनिबार र आइतबार बिदा लागू गरे पनि खानीखोला गाउँपालिकाले भने शनिबार मात्रै बिदा दिने निर्णय गरेको हो ।

जेठ १७ गते बसेको कार्यपालिका बैठकले आइतबार बिदा नदिने निर्णय गरेको हो । ‘सरकारले जे उद्देश्य राखेर आइतबार बिदा दिने निर्णय गरेको हो, त्यो उद्देश्यसँग हाम्रो गाउँपालिकाको कुनै साइनो रहँदैन,’ गाउँपालिका अध्यक्ष इन्द्रबहादुर थिङले भने, ‘पेट्रोलियम पदार्थको सहजताका लागि सरकारले बिदा दिने निर्णय गरेको हो, हाम्रोजस्तो गाउँपालिकामा यो बिदा जरुरी छैन भन्ठानेर हामीले आइतबार बिदा नदिने निर्णय गरेका छौँ ।’

शुक्रबार भने बिहान १० बजेदेखि दिउँसो ३ बजेसम्म कार्यालय समय रहने छ ।