तत्कालका लागि रोकियो मन्त्रिपरिषद् हेरफेर, बजेट पारित नहुँदासम्म मन्त्री नफेर्ने सहमति

संसदमा विचाराधीन बजेट पारित नगरी मन्त्रिपरिषद् फेरबदल नगर्ने सत्ता गठबन्धनबीच सहमति भएको छ ।

यससँगै नेकपा एसले सिफारिस गरेका ४ जनाले तत्काल मन्त्रीको शपथ लिन नपाउने भएका छन् ।

संसदमा बजेटको मन्त्रालयगत छलफल शुरू भएको अवस्थामा मन्त्रीहरूले जवाफ नदिई फेरबदल गर्नु संसदीय परम्परा विपरीत हुने भन्दै मन्त्रिपरिषद् फेरबदल तत्कालका लागि स्थगित भएको हो ।

प्रधानमन्त्री निवास बालुवाटारमा सोमवार बिहान बसेको सत्ता गठबन्धनको बैठकले तत्काल मन्त्रिपरिषद् नचलाउने निर्णय गरेको छ । ‘कम्तिमा बजेट पारित नहुँदासम्म कुनै पनि दलका मन्त्री नफेर्ने सहमति भयो,’ बालुवाटार बैठकको निर्णयबारे नेकपा एसका एक नेताले भने । 

गठबन्धनको सहमतिबारे नेकपा एसका अध्यक्ष माधवकुमार नेपालले सरकारका मन्त्रीहरूलाई जानकारी गराएका छन् ।

स्रोतका अनुसार नेता नेपालले बालुवाटार बैठकमा पार्टीको सिफारिस अनुसार नयाँ मन्त्रीलाई शपथ गराउन आग्रह गरेका थिए तर प्रधानमन्त्री शेरबहादुर देउवाले बजेट पारित नगरी मन्त्री फेर्न नहुने बताएका थिए । 

नेकपा एसले मन्त्री फेर्ने निर्णय गरेसँगै अन्य दलमा पनि दबाब बढेको थियो । देउवाको प्रस्तावमा माओवादी केन्द्रका अध्यक्ष पुष्पकमल दाहाल ‘प्रचण्ड’ पनि सहमत भएपछि मन्त्री फेर्ने नेकपा एसको निर्णय अलपत्र बनेको छ । 

आइतवार बसेको पार्टी सचिवालयको बैठकले ४ मन्त्रीलाई फिर्ता बोलाएर नयाँ सिफारिस गरेको थियो । नेपालले आइतवार नै प्रधानमन्त्री देउवालाई भेटेर नयाँ मन्त्रीको नाम बुझाएका थिए । 

स्वास्थमन्त्री विरोध खतिवडा, शहरी विकास मन्त्री रामकुमारी झाँक्री, संस्कृति मन्त्री प्रेम आले र श्रम तथा रोजगार मन्त्री कृष्णकुमार श्रेष्ठलाई सरकारबाट फिर्ता बोलाउने निर्णय एसले गरेको थियो । 

४ मन्त्रीलाई फिर्ता बोलाएर स्वास्थ्यमा भवानी खापुङ, शहरी विकासमा मेटमणि चौधरी, संस्कृतिमा जीवनराम श्रेष्ठ र श्रममा शेरबहादुर कुँवरलाई मन्त्री बनाउन सिफारिस गरिएको थियो । 

गठबन्धनका शीर्ष नेताहरूबीच सोमवारको बैठकमा अन्य विषयमा भने खास छलफल नभएको बालुवाटार स्रोतले जानकारी दियो । मन्त्रीबाट हटाउने निर्णय कार्यान्वयन नगर्न ४ मन्त्रीले प्रधानमन्त्री शेरबहादुर देउवा र माओवादी केन्द्रका अध्यक्ष प्रचण्डको समेत ध्यानाकर्षण गराएका थिए ।