लुम्बिनी प्रदेश सरकारका प्रवक्ता एवं आन्तरिक मामिला तथा सञ्चार मन्त्री तिलकराम शर्माले स्वास्थ्य राज्यमन्त्री विमला वली पक्राउ परेको विषयमा अध्ययन गर्ने बताएका छन् । उनले मन्त्री वली पक्राउ परेको विषयमा अनौपचारिक सुने पनि आधिकारिक जानकारी अहिलेसम्म सरकारलाई नआएको बताए ।

‘मैले पनि उहाँ दाङबाट पक्राउ परेको सुनेँ,’ प्रवक्ता शर्माले भने, ‘उहाँ (विमला) लाई फोन गर्दा सम्पर्क हुन सकेन । हामीलाई अहिलेसम्म आधिकारिक ‘इन्फर्मेसन’ आएको छैन । जिम्मेवार व्यक्तिले त्यस्तो कुटपिट गर्ने काम गर्नुभएको रहेछ भने, त्यसको गम्भीर अध्ययन र समीक्षा हुन्छ ।’ 

यो पनि पढ्नुहोस्

राज्यमन्त्री वलीले ‘प्रेमी’ भनिएका व्यक्तिको घरमा आतंक मच्चाएपछि...

​मन्त्री वलीलाई हटाउने विषयमा सोच्न सक्छ कि सक्दैन भन्ने प्रश्नमा शर्माले भने, ‘अहिले त्यो विषयमा पुगिसक्ने अवस्था भएको छैन । घटनाको अध्ययन भएपछि मात्र त्यो विषयमा छलफल होला ।’ उनी माओवादी केन्द्रबाट राज्यमन्त्री बनेकी हुन् । उनी तत्कालीन नेकपाबाट उपनिर्वाचनमा निर्वाचित प्रदेश सभा सदस्य हुन् । 

मन्त्री वली दाङको तुलसीपुर उपमहानगरपालिका–५ सब्जीमण्डीस्थित एकराज बस्नेतको घरमा पुगेर उनकी श्रीमती मीना भण्डारी र छोरीलाई कुटपिट गरी तोडफोडमा उत्रिएपछि स्थानीयले नियन्त्रणमा लिएर प्रहरीलाई बुझाएका थिए । 

अहिले वलीलाई कारवाहीको माग गर्दै इलाका प्रहरी कार्यालय तुलसीपुर अगाडि स्थानीयवासीले नाराबाजी गरेका छन् । अर्कैको घरमा पुगेर हातपातमा उत्रिएकी मन्त्री वलीलाई कडाभन्दा कडा कारबाहीको माग गर्दै नाराबाजी भइरहेको छ । वलीको घर दाङको दंगीशरण गाउँपालिकामा पर्छ ।