सञ्चारकर्मबाट राजनीतिमा होमिएका रवि लामिछानेले 'राष्ट्रिय स्वतन्त्र पार्टी' घोषणा गरेका छन् ।  मंगलवार काठमाडौंको राष्ट्रिय सभा गृहमा आयोजित कार्यक्रममा उनले राष्ट्रिय स्वतन्त्र पार्टी दर्ता गर्ने घोषणा गरेका हुन् । 

आफू क्षमता हुँदासम्म उक्त पार्टीमा रहने र क्षमतायुक्त व्यक्तिहरूको लागि यो राजनीतिक प्लेटफर्म तयार गरिएको उनले बताए ।  

उनले नेपालमा अहिलेसम्म भएका कुनै पनि राजनीतिक दलमा प्रवेश नगर्ने घोषणा गरेका छन् । 

काठमाडौंको राष्ट्रिय सभा गृहमा आयोजित पार्टी घोषणा कार्यक्रममा लामिछानेले भने, ‘नेपालमा आजसम्म दर्ता रहेका कुनै पनि दलमा प्रवेश गर्ने छैन ।’

कुनै दलमा प्रवेश गरेर आफू विलीन हुन नचाहेको उनले बताए । राजनीतिक दलमा राम्रा मान्छेहरु भएको तर उनीहरुले आवश्यकता अनुसार विद्रोह गर्न नसकेको लामिछानेले बताए । 

आफ्नो पालो पर्खेर बस्नेको ठूलो समूह राजनीतिक दलमा रहेको उनले बताए ।

आफूले नेपाली जनताले चाहेजस्तो अहिलेको समयले खोजेजस्तो राजनीतिक दल बनाएर राजनीतिमा आउने उनले बताए ।