नेपाली कांग्रेसले विराटनगर महानगरपालिकाका निवर्तमान मेयर भीम पराजुलीसहित ७ जनालाई कारबाहीको सिफारिस गरेको छ । पराजुली कांग्रेसका केन्द्रीय सदस्यसमेत हुन् । 

आफ्नै पार्टीका उम्मेदवारलाई हराउन अन्य पार्टीका उम्मेदवारलाई सघाएको भन्दै पराजुलीकै वडाका ७ जनालाई कारबाही गर्न जिल्ला कमिटीलाई सिफारिस गरिएको हो । 

स्थानीय तह निर्वाचनमा कांग्रेस विराटनगर–३ ले पार्टीका उम्मेदवारहरूले पराजुलीसहित ७ जनाले असहयोग गरेको भन्दै कारबाहीका लागि क्षेत्रीय समितिमा पत्र पठाएका थिए । 

सोही पत्र जिल्ला कमिटीलाई पठाएको क्षेत्रीय सभापति विनोद बस्नेतले बताए । कांग्रेस छाडेर नेपाली कांग्रेस बिपीबाट रामचन्द्र गौतम मेयरमा उठेका थिए । 

यस्तै बुथ सभापति सत्रुधनचन्द्र पौडेल वडाध्यक्षमा बागी उम्मेदवार बनेका थिए । पौडेल पराजुलीका भिनाजु हुन् । 

कारबाहीको सिफारिसमा भीमका दाइ चूडामणि पराजुली पनि छन् ।

पौडेलले बुथ सभापतिबाट राजीनामा दिएर बागी उठेका थिए ।  कांग्रेसका उम्मेदवार कमल पुडासैनीले एमालेका बासु बस्नेतसँग  ४ सय मतको अन्तरले हारेका थिए ।

कारबाही सिफारिस परेकाहरूमा पूर्व जिल्ला सदस्य विनोद निरौला, बुथ सभापतिमा पराजित धर्म बानियाँ धर्मेन्द्र, कृष्ण भण्डारी पनि छन् ।