सशस्त्रमा हवल्दारदेखि डीएसपीसम्म बढुवा हुँदै, १६ वर्षदेखि रोकिएको इन्स्पेक्टर बढुवाको लाइन खुल्यो

सशस्त्र प्रहरीमा धमाधम बढुवा प्रक्रिया अगाडि बढेको छ ।

माथिल्लो तहमा खाली नहुँदा रोकिएको सशस्त्रको बढुवा नयाँ नेतृत्व आएसँगै अगाडि बढेको हो । 

सशस्त्र प्रहरीमा १६ वर्षदेखि अड्किएको प्रहरी निरीक्षक (इन्स्पेक्टर) को बढुवा नभएर सशस्त्र प्रहरीको करिअर योजनामाथि प्रश्न उठ्दै आएको थियो । तर, अहिले त्यसलाई व्यवस्थापन गरेर तल्लो तहका सशस्त्र प्रहरी कर्मचारीहरूको बढुवा निस्कन लागेको हो । 

असार महिनाको अन्तिमसम्म सशस्त्र प्रहरी सहायक हवल्दारदेखि माथि खाली रहेका पदहरूमा परिपूर्ति गर्न लागेको सशस्त्र प्रहरी बलले जनाएको छ । 

‘हवल्दारदेखि माथि सबै बढुवा प्रक्रिया असार मसान्तसम्म सक्ने योजनामा छौं,’ सशस्त्र प्रहरी महानिरीक्षक (आईजीपी) राजु अर्यालले लोकान्तरसँग भने ।

सशस्त्र प्रहरी बलले असार १२ गते सशस्त्र प्रहरी वरिष्ठ नायव निरीक्षक (वरिष्ठ सई)को साधारण समूह र उपसमूह, लेखाको पनि समूह र उपसमूहको बढुवा गर्नका लागि निवेदन आह्वान गरेको छ । 

प्राविधिकतर्फका सशस्त्र प्रहरी कर्मचारीहरूको बढुवाका लागि पनि सिफारिस गरिएको छ । सशस्त्र प्रहरी निरीक्षकबाट सशस्त्र प्रहरी नायव उपरीक्षक (डीएसपी) पदमा बढुवाका लागि आवेदन आह्वान गरेर बढुवा प्रक्रियामा गएको छ । 

लामो समयदेखि रोकिएको बढुवा प्रक्रियाले कर्मचारीको मनोबलमा असर परेको भन्दै केही महिनाअघि तल्लो दर्जालाई लक्षित गरेर नियमावली संशोधन गरिएको थियो । असार महिनामा ३७ जनालाई प्रहरी उपरीक्षक (एसपी) पदमा बढुवा गरिएको थियो । बैशाखमा ८७ जना सि‍ सं‍ ६ इन्स्पेक्टर डिएसपीमा बढुवा भएका थिए ।

आज (मंगलवार) इन्स्पेक्टरबाट डीएसपीमा ५६ जनाको बढुवा सिफारिस हुने सम्भावना छ ।