काठमाडौंस्थित संयुक्त राष्ट्रसंघीय उच्च आयुक्तको कार्यालय (यूएनएचसीआर) अघि रोहिंग्या शरणार्थीहरूले विरोध प्रदर्शन गरेका छन् । 

संयुक्त राष्ट्रसंघले जारी गरेको मानव अधिकारसम्बन्धी विश्वव्यापी घोषणापत्र सन् १९८४ ले उल्लेख गरेका अधिकारको माग गर्दै आन्दोलन गरेका हुन् । 

विश्वव्यापी घोषणापत्रमा आर्थिक, सामाजिक, सांस्कृतिक र बालबालिकाको अधिकार सुनिश्चित गर्नुपर्ने लगायतका माग गरेका छन् ।

म्यानमार, श्रीलंका, पाकिस्तान, अफगानिस्तान, सोमालिया, नाइजेरिया लगायतका देशबाट नेपालमा शरणार्थीको रुपमा आएका उनीहरूले यूएनएचसीआरले चासो नदिएको गुनासो गरे । यूएनएचसीआरले आर्थिक तथा सामाजिक गतिविधिहरुमा चासो नदिँदा मानव अधिकारको हनन भएको उनीहरूको भनाइ छ । 

प्रदर्शनकारीहरूले सोमवार प्रहरी प्रशासनबाट महिला, बालबालिकाहरू कसैको पर्वाह नगरी लाठी चार्ज गरेर निर्दयको भाव देखाएको आरोप लगाए । 

श्रीलंकाबाट नेपालमा आई शरणार्थीको रुपमा बसोबास गरिरहेका सुरेशकुमार राजेश्वरले २०१५ सम्म सहयोग गरे पनि यूएनएचसीआरले पछिल्लो समय बेवास्ता गरिरहेको बताए । उनले बालबालिकाहरूलाई निजी विद्यालयमा पढ्नबाट वञ्चित गरेको र बस्न पनि समस्या रहेकाले यो समस्या समाधान गर्न आफू प्रदर्शनमा आउनुपरेको बताए । 

यूएनएचसीआरले खान, बस्न र बालबालिकाको अध्ययनका लागि आर्थिक सहयोग गर्दै आइरहे पनि पछिल्लो समय सरकारी विद्यालयमा बालबालिकालाई पढाउनुपर्ने र आफूलाई दिइने रकम पनि दिन छोडेको गुनासो गरे । 

रोहिंग्या शरणार्थीहरूले बालबालिकाहरूको अधिकार हनन गरिरहेको भन्दै सोमवारबाट विरोध प्रदर्शन गरिरहेको छ । मानव अधिकारसम्बन्धी विश्वव्यापी घोषणापत्र सन् १९८४ ले उल्लेख गरेका अधिकारलाई यूएनएचसीआरले नियमतः पालना नगर्दा आफ्ना बालबालिकाहरूको अधिकार हनन भएको उनीहरूको गुनासो छ ।