काठमाडौंको गौशाला चोकमा एउटै नम्बरका दुई वटा मोटरसाइकल सँगै भेटिएका छन् । 

गौशालाको ट्राफिक जाममा भेटिएका एउटै नम्बर प्लेटका दुईवटा मोटरसाइकल सँगै भेटिएको फोटो अहिले सामाजिक सञ्जालमा भाइरल भइरहेको छ । 

अहिले मोटरसाइकलका सक्कली धनी प्रहरीको सम्पर्कमा आएका छन् । उनी अहिले सिंहदरवारको बग्गी खानामा छन् ।

काठमाडौं उपत्यका ट्राफिक प्रहरी कार्यालय बग्गीखानाका प्रवक्ता एसपी सन्जीवदास शर्माका अनुसार सक्कली धनी प्रहरीको सम्पर्कमा आएका छन् । अर्का मोटरसाइकल सवारी चालकलाई प्रहरीले खोजी रहेको छ । 

प्रहरीका अनुसार सीसीटीभीबाट ट्रेसिङ गरिसकिएको छ । मोटरसाइकल छिट्टै नियन्त्रणमा लिने प्रवक्ता शर्माले लोकान्तरलाई बताए । 

पानी परिरहेको समयमा आज बिहान गौशालाको जाममा बागमती प्रदेश ०२–०२२ प २३८० नम्बरका २ वटा मोटरसाइकल देखा परेपछि प्रदीपजंग क्षेत्रीले फोटो खिचेर सामाजिक सञ्जालमा सार्वजनिक गरेका थिए । 

त्यसपछि उपत्यका ट्राफिक प्रहरी र प्रहरीले मोटरसाइकलबारे सत्यतथ्य खोजिरहेका छन् ।