आगामी निर्वाचनमा वाम पार्टीहरूबीच एकीकरण गराउने प्रयासलाई तीव्र बनाएका नेपाल कम्युनिस्ट पार्टी एकता राष्ट्रिय अभियानका संयोजक वामदेव गौतम खुमलटार पुगेका छन् । बिहीवार बिहान नेकपा एमालेका अध्यक्ष केपी ओलीलाई आफ्नै निवास बालकोटमा पुगेर भेट गरेका उनी अपरान्ह नेकपा माओवादी केन्द्रका अध्यक्ष पुष्पकमल दाहाल प्रचण्डलाई भेट्न उनकै निवास खुमलटार पुगेका हुन् । 

वाम पार्टीहरूबीच एकताको प्रयासमा लागेका उनले कम्युनिस्ट पार्टीका शीर्ष नेताहरूसँगको सम्वाद बढाएका हुन् । दाहाल र गौतमबीचको भेटमा वाम पार्टीहरूबीच पार्टी एकीकरणको विषयमा कुराकानी भएको बताइएको छ । एमाले अध्यक्ष ओलीलाई जस्तै गौतमले प्रचण्डलाई पनि पार्टी एकता गर्न नसकिए पनि आगामी प्रतिनिधि सभा र प्रदेश सभाको निर्वाचनमा वाम पार्टीहरूबीच मोर्चा बनाएर जानुपर्ने प्रस्ताव गरेका छन् ।

वाम पार्टीहरूबीचको मोर्चाबन्दीले मुलुकलाई फाइदा पुर्याउने भन्दै मोर्चा बनाउन गौतमले प्रचण्डलाई पनि प्रस्ताव गरेको उनका सहयोगी विनोद टमाटाले जानकारी दिए । दुई नेताका बीचमा पार्टी एकता, मोर्चाबन्दी तथा अन्य समसामयिक विषयमा कुराकानी भएको उनको भनाइ छ । 

गत मंगलवार नयाँ दल गठन गरेका गौतमले बिहीवारबाट राजनीतिक भेटवार्ता तीव्र बनाएका छन् । नयाँ दल गठनपछि पनि वाम एकताको अभियानलाई उनले निरन्तरता दिने बताइरहेका छन् । 

नेकपा एमाले र माओवादी केन्द्रको एकता पछि बनेको नेकपा भंग भएर दुई पार्टी पूर्ववत अवस्थामा फर्किएपछि गौतम तटस्थ बसेका थिए । उनले फेरि पनि एकताको प्रयास गर्ने भन्दै नेपाल कम्युनिस्ट पार्टी एकता राष्ट्रिय अभियान चलाउँदै आएका छन् ।