तल्लो तहसम्म संरचना नहुँदा प्रदेश सरकारले खर्च गर्न नसकेको भनेर विरोध भइरहेका बेला प्रदेश १ सरकारले खर्चमा सुधार ल्याएको छ । 

प्रदेश सरकारले चालू आर्थिक वर्षमा पुँजीगततर्फ ९० प्रतिशत बजेट खर्च गरेको छ । असार २५ गतेसम्म प्रदेश सरकारले बजेटको ९० प्रतिशत खर्च गरेको आर्थिक मामिला तथा योजना मन्त्रालयले जनाएको छ । 

चालू आर्थिक वर्षका लागि प्रदेश १ सरकारले पुँजीगततर्फ १८ अर्ब ६ करोड ३० लाख ८५ हजार रुपैयाँ बजेट विनियोजन गरेकोमा १६ अर्ब ८५ करोड बजेट खर्च भएको आर्थिक मामिला तथा योजना मन्त्री इन्द्र आङ्बोले बताए । 

गत आर्थिक वर्षमा पुँजीगत खर्च ६५ प्रतिशत मात्रै भएको थियो । चालू आर्थिक वर्षमा प्रदेश सरकारले ३४ अर्ब ५४ करोड १३ लाख बराबरको बजेट ल्याएको थियो । जसमध्ये  ३० अर्ब २८ करोड खर्च भएको प्रदेश कोलेनिकाले जनाएको छ । चालूतर्फ १६ अर्ब ६३ करोड ८ लाख बजेटमध्ये ७९ प्रतिशत बजेट खर्च भएको छ । स्थानीय तहको अनुदान ९८ प्रतिशत बजेट खर्च भएको प्रदेश कोलेनिकाले जनाएको छ । 

असारे खर्चमा पनि सुधार

प्रदेश १ सरकारले असार १–२५ गतेसम्म २५ दिनमा ९ अर्ब ६७ करोड रुपैयाँ खर्च गरेको छ । चालूतर्फ ३ अर्ब २३ करोड र पुँजीगततर्फ ६ अर्ब ४४ करोड रूपैयाँ अर्थात् ३१.९५ प्रतिशत खर्च गरेको प्रदेश लेखा नियन्त्रक कार्यालय विराटनगरले जनाएको छ । 

अघिल्ला आर्थिक वर्षको तुलनामा बजेट खर्चमा सुधार हुँदै आएको छ । प्रदेश सरकार बनेको पहिलो वर्ष असारमा मात्रै बजेटको ५० प्रतिशत भुक्तानी गरिएको थियो । आर्थिक वर्ष ०७६/०७७ को बजेटमा केही सुधार गरेर असारमा ४० प्रतिशत भुक्तानी भएको थियो ।

आव २०७७/०७८ मा ३० प्रतिशत भ्ुक्तानी असारमा गरिएको छ । चालू आवमा अघिल्ला वर्षभन्दा कम भुक्तानी भएको प्रदेश कोलेनिकाका सूचना अधिकारी ऋषिकुमार खनालले बताए । 

‘वैशाख अन्तिमदेखि नै झरी–बादलका कारणले प्रदेशमा विकास निर्माणका काम भएका छैनन्,’ आर्थिक मामिला तथा योजना मन्त्री इन्द्रबहादुर आङ्बोले भने, ‘निर्माण व्यवसायीहरू भुक्तानी लिन असार लागेपछि मात्रै आएकाले असारमा खर्च बढी देखियो ।’ उनले यसपटक असारे विकास रोकिएको दाबी गरेका छन् ।