नेपाली कांग्रेसका केन्द्रीय सदस्य रामहरि खतिवडाले पार्टीभित्रको विबादलाई बाहिर नपोख्न नेतृत्वसँग आग्रह गरेका छन् । सबै असन्तुष्टि र गुनासो पार्टीको बैठकमा छलफल गर्न सकिने तर बाहिर लैजाँदा कांग्रेस कमजोर हुने उनले बताए ।

केन्द्रीय समिति बैठकलाई मंगलवार सम्वोधन गर्दै खतिवडाले एकले अर्कालाई खुइल्याउने काम बन्द गर्न माग गरेका हुन् । ‘२०७० सालको चुनावमा कांग्रेस पहिलो पार्टी बन्दापनि नेतृत्वको विरोध गरिएको थियो, अहिले पनि कांग्रेस पहिलो हुँदा त्यस्तै गरिएको छ’ खतिवडाले भने, ‘सभापति शेरबहादुर देउवालाई खुइल्याएर नेता शेखर कोइराला बलियो हुनुहुन्न, शेखरलाई खुइल्याएर देउवा पनि बलियो हुनुहुन्न ।’

केन्द्रीय सदस्य खतिवडाले पार्टीभित्र नबोल्ने तर बाहिर हुँकार गर्ने गरेको भन्दै महामन्त्रीद्वय गगन थापा र विश्वप्रकाश शर्माको पनि आलोचना गरेका थिए । ‘महामन्त्रीहरूले पनि पार्टीमा नबोल्ने बाहिर चर्को कुरा गरेर पार्टी बलियो हुँदैन’ खतिवडाले भने । 

गाउँमा कांग्रेसको पक्षमा जागरण आएको भन्दै भातृ संगठनलाई पूर्णता दिएर चुनावमा होमिन उनले प्रस्ताव गरेका छन् । कांग्रेस केन्द्रीय समितिको बैठक बुधवार पुनः बस्दैछ ।