सुनसरी र उदयपुरमा बुधवार भएको सवारी दुर्घटनामा २ जनाको मृत्यु भएको छ । 

१ नम्बर प्रदेश प्रहरी कार्यालय विराटनगरका अनुसार सुनसरीको बराहक्षेत्र नगरपालिका–३ भरौलीमा दक्षिणबाट उत्तरतर्फ जाँदै गरेको को १ च ७७९१ नम्बरको सुमोले ठक्कर दिँदा साइकलमा सवार एक जनाको मृत्यु भएको हो । सुमोको ठक्करबाट घाइते भएका बराहक्षेत्र नगरपालिका–५ का ६० वर्षीय दुखिलाल धामीको मृत्यु भएको प्रहरीले जनाएको छ । घाइते धामीलाई उपचारका लागि धरानस्थित बिपी कोइराला स्वास्थ्य विज्ञान प्रतिष्ठान लैजाने क्रममा बाटैमा मृत्यु भएको थियो । 

त्यस्तै, उदयपुरको कटारीबाट मैयाखुतर्फ जाँदै गरेको प्रदेश २–०१–००१ च ०२४३ नम्बरको बोलेरो कटारी नगरपालिका–४ मा अनियन्त्रित भई दुर्घटना हुँदा १ जनाको मृत्यु भएको छ । उक्त दुर्घटनामा अरू ८ जना घाइते भएका छन् ।

उक्त दुर्घटनामा घाइते भएकामध्ये कटारी नगरपालिका १३ का १८ वर्षीय विष्णु राउतको बिपी प्रतिष्ठानमा उपचारका क्रममा मृत्यु भएको हो । अन्य घाइतेहरूको सोही अस्पतालमा उपचार भइरहेको प्रहरीले जनाएको छ । घटनाका सम्बन्धमा प्रहरीले अनुसन्धान गरिरहेको छ ।