भारत भ्रमणमा रहेका नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले भारतीय विदेशमन्त्री एस जयशंकरसँग भेटवार्ता गरेका छन् । शुक्रवार भारत भ्रमणका लागि नयाँदिल्ली पुगेको प्रचण्डले शनिवार विदेशमन्त्री जयशंकरसँग भेट गरेका हुन् । 

भेटमा उनीहरूबीच नेपाल–भारत सम्बन्ध लगायतबारेमा छलफल भएको बताइएको छ । प्रचण्डसँग भएको भेटको तस्वीर ट्वीटरमार्फत सार्वजनिक गर्दै विदेशमन्त्री जयशंकरले भारत नेपालको असल छिमेकी राष्ट्र भएको बताएका छन् । उनले लेखेका छन्, ‘छिमेकी पहिलो नीतिलाई प्रतिबिम्बित गर्दै नेपालको विकास र समृद्धिको चाहनामा भारत सदैव भरपर्दो साझेदार रहनेछ ।’

उनले शनिबार नै भारतीय सुरक्षा सल्लाहकार अजित डोभललगायतसँग भेटवार्ता गर्ने कार्यक्रम छ । त्यस्तै शनिवार नै उनले भाजपा अध्यक्ष जगतप्रकाश नाड्डालाई पनि भेट्ने कार्यक्रम छ । आइतवार प्रचण्डले भारतीय प्रधानमन्त्री नरेन्द्र मोदीसँग भेट गरेर स्वदेश फर्कने कार्यक्रम रहेको प्रचण्डको सचिवालयले जनाएको छ । 

भारतीय जनता पार्टीका अध्यक्ष जगतप्रकाश नाड्डाको निमन्त्रणामा भारत भ्रमणमा गएका उनले शनिबार विहान भारतमै रहेकी प्रधानमन्त्री शेरबहादुर देउवा पत्नी आरजु देउवासँग भेट गरेका थिए ।