राष्ट्रपति विद्यादेवी भण्डारीले जनताले पायक पर्ने स्थानबाटै स्वास्थ्य सेवा पाउने वातावरण बनाउन सरकारको ध्यानाकर्षण गराएकी छन् । उपचारका लागि ठूला शहर, राजधानी र विदेश धाउनुपर्ने परिस्थितिको अन्त्य गरी जनतालाई सहज हुने स्थानमा स्वास्थ्य सेवा दिलाउन सरकारको ध्यानाकर्षण गराएकी हुन् । 

आइतवार काठमाडौंमा आयोजित चिकित्सा शास्त्र अध्ययन संस्थानको स्वर्ण जयन्ती समारोहमा उनले मेडिकल शिक्षा र स्वास्थ्य सेवालाई जनताको आकांक्षाअनुसार व्यवस्था गर्न स्वदेशमा मेडिकल शिक्षाको प्रवद्र्धन गर्न आवश्यक भएको बताइन् । नेपालको संविधानले स्वास्थ्य सेवामा सबैको पहुँच पुर्‍याउने कुरालाई मौलिक हकको रूपमै व्यवस्था गरेको उल्लेख गर्दै राष्ट्रपति भण्डारीले स्वास्थ्य सेवा उपलब्ध गराउन राज्यले आवश्यक नीति, कार्यक्रम र योजना तर्जुमा गर्नुपर्ने बताइन् । 

स्वास्थ्य सेवा उपलब्ध गराउन भौतिक एवं संस्थागत पूर्वाधारको व्यवस्था गर्न ढिलाई गर्न नहुने राष्ट्रपति भण्डारीको भनाइ छ । उनले चिकित्सा शास्त्र अध्ययन संस्थानले स्वास्थ्य सेवाका लागि आवश्यक जनशक्ति निर्माणमा निरन्तर नेतृत्वदायी भूमिका निर्वाह गर्ने विश्वास समेत व्यक्त गरिन् । उनले भनिन्, ‘जनताको आकांक्षा बमोजिम स्वास्थ्य शिक्षा तथा सेवामा सबैको पहुँच स्थापित गर्न स्वदेशमै भएका मेडिकल शिक्षाको प्रवद्र्धन गरी स्वावलम्बी तथा आत्मनिर्भर स्वास्थ्य प्रणालीको विकास गर्नु अति आवश्यक छ ।’

मुलुकमा मेडिकल शिक्षाको विस्तार गर्दा सबै प्रदेश, भूगोल र क्षेत्रमा अवसरलाई विकेन्द्रिकृत गर्नु पर्ने राष्ट्रपति भण्डारीको धारणा छ ।