अमेरिकी सैन्य साझेदारी कार्यक्रम (एसपीपी)को सम्बन्धमा संसद्लाई जानकारी गराउन सभामुख अग्निप्रसाद सापकोटाले सरकारलाई रुलिङ गरेका छन् । संसदमा सत्तारुढ दलकै सांसदहरूले प्रश्न उठाएपछि सभामुख सापकोटाले त्यसबारे जानकारी दिन सरकारलाई निर्देशन दिएका हुन् । 

प्रतिनिधिसभाको बिहीबार बसेको बैठकमा सत्तारुढ नेकपा माओवादी केन्द्रका सांसद देव गुरुङसहितले एसपीपी अघि नबढाउने सरकारको निर्णय शंकास्पद भन्दै प्रश्न उठाएका थिए । बिहीवारको बैठकमा नेकपा एसका सम्मानित नेता झलनाथ खनाल, नेकपा एमालेका भीमबहादुर रावललगायतका सांसदहरूले एसपीपी सम्झौताका विषयमा प्रश्न उठाएपछि सभामुख सापकोटाले यसबारेमा रुलिङ गरेका हुन् । 

‘एसपीपी सम्झौताबारे माननीयज्यूहरुले उठाउनु भएको कुरामा मेरो ध्यानाकर्षण भएको छ । त्यससम्बन्धमा नेपाल सरकारको निर्णय र त्यसको कार्यान्वयनको अवस्थाबारे जानकारी गराउनुहुन नेपाल सरकारलाई निर्देशन गर्दछु,’ सापकोटाले भने ।