केही दिनअघि भक्तपुरकी सुप्रीया (नाम परिवर्तन) कामका सिलसिलामा आफन्तको घर ठमेल आएकी थिइन् । आफन्तको घरमा खाना खाएर राति १० बजे आसपास भक्तपुर जानका लागि उनले ‘ड्राइभिङ एप’ इनड्राइभरबाट ट्याक्सी बुक गरिन् । ट्याक्सीमा चढेर उनी भक्तपुर घर गइन् ।

अर्को दिनभर घरमा व्यस्त भइन् । राति सुत्ने बेला १० बजेको समयमा उनको मोबाइलको घण्टी बज्न थाल्यो । मोबाइलमा फोन गर्नेले उनलाई ‘तेरो रेट कति हो ? राम्री छस्, ५ हजार दिन्छु, कहाँ आउछेस् ?’ भन्यो । 

फोन गर्नेको कुरा सुनेपछि उनी छाँगाबाट खसेजस्तै भइन् । उनलाई के गरु, कसो गरु भयो । त्यो दिन उनले मोबाइल अफ गरिन् ।

त्यसपछि उनले सोच्न थालिन्, ‘किन यस्तो फोन आयो ? कसले कहाँ नम्बर शेयर ग¥यो ?’ उनले दिमाग खियाउन थालिन् ।

क–कससँग आफ्नो नम्बर छ ? कसले यस्तो गर्न सक्छ ? उनी रनभूल्लमा परिन् । आफूसँग सम्पर्कमा रहेका सबै व्यक्तिको सम्पर्क नम्बर पनि चेक गरिन् । उनलाई कसैमाथि शंका लागेन तर उनलाई याद आयो अघिल्लो दिन इनड्राइभरबाट बुक गरेको ट्याक्सी ड्राइभरले हो कि भन्ने लाग्यो । त्यसपछि उनी प्रहरी कहाँ पुगिन् ।

संयोगले प्रहरी कहाँ उनले चिनेकै तेस्रोलिङ्गी महिला पनि त्यहाँ आएकी रहिछन् । कसैले उनको फोटो दुरुपयोग गरेर सामाजिक सञ्जाल फेसबूकमा ‘फेक अकाउन्ट’ खोलेर विभिन्न व्यक्तिहरूको नम्बर शेयर गरेको रहेछ । सुप्रीयाले आफ्नो फोन नम्बर पनि त्यहाँ देखेपछि झन् चकित परिन् ।

दुवै जनाले साइबर ब्यूरोमा उजुरी दिए । सुप्रीयाले ट्याक्सी ड्राइभरमाथि शंका लागेको बताइन् । ती तेस्रोलिङ्गीले फेक अकाउन्ट बनाउनेलाई कारवाही गर्न भन्दै उजुरी दिइन् ।

प्रहरीले काभ्रेपलाञ्चोकको नमोबुद्ध नगरपालिका–५ का २४ वर्षीय कर्मा स्वाङसिङ लामालाई नियन्त्रणमा लियो । उनी नियन्त्रणमा आइसकेपछि सुप्रीया र तेस्रोलिङ्गीको फोटो प्रयोग गर्ने एकैजना भएको तथ्य खुल्यो ।

प्रहरीलाई दिएको बयानका अनुसार लामाले रातिमा ठमेल लगायतका क्षेत्रमा ट्याक्सी चलाउने गरेको र इनड्राइभरमार्फत यात्रा गर्ने युवतीहरूको फोन नम्बर, ठेगाना राखेर पोर्न साइडहरूमा पठाइदिने गर्ने गरेको खुल्यो ।

‘यसले राम्री युवतीहरूको ठेगाना फोन नम्बर पोर्न साइडमा समेत पठाउने गरेको देखिएको छ,’ ब्यूरोका इन्स्पेक्टर राजकुमार खड्गीले लोकान्तरसँग भने, ‘यसले त्यति मात्र नभएर फेक अकाउण्ट खोलेर समेत दुरुपयोग गरेको देखिएको छ ।’

इन्स्पेक्टर खड्गीका अनुसार व्यक्तिको सम्पर्क नम्बरबाट फेक अकाउण्ट बनाउने अनि ‘यो नम्बरकी केटी यौनकर्मी हो’ भन्दै शेयर गर्दा रहेछन् । त्यहाँ दिएको नम्बरबाट फोन गरेर निर्दोष व्यक्तिहरूलाई फसाउने गरेको देखिएको छ । त्यति मात्र नभएर उनले सामाजिक सञ्जालहरूमा ‘सन्डे मेटिरियल’ नामको म्यासेन्जर ग्रूप बनाएर समेत नम्बर शेयर गर्ने गरेको खुलेको छ । 

‘तेस्रोलिङ्गीहरूको नामबाट फेसबूक खोलर यस्ता कुरा राख्दा मानिसहरूले विश्वास गर्ने भएकाले मैले खोलेर राख्ने गरेको हुँ,’ प्रहरीको प्रारम्भिक बयानमा लामाले भनेका छन् । प्रहरीका अनुसार उनले रातिमा ठमेल, दरबारमार्ग लगायतबाट ड्राइभिङ एपमा सम्पर्क गरेर युवतीलाई फसाएको देखिएको छ ।

ब्यूरोका इन्स्पेक्टर खड्गीका अनुसार पछिल्लो समय ‘शेयरिङ एप’ पठाओ, टुटल, इनड्राइभरमा समस्या देखिएको छ । 

‘शेयरिङ एपहरू चलाउँदा व्यक्तिहरूले सुरक्षाको विषयमा पनि ध्यान दिनुपर्ने देखिएको छ । एपमार्फत सम्पूर्ण इन्फरमेसन जाने भएकाले भविष्यमा थ्रेट देखिन्छ,’ खड्गीले लोकान्तरसँग भने ।

ब्यूरोले लामालाई बुधवार पक्राउ गरेर जिल्ला अदालत काठमाडौंबाट ५ दिनको म्याद थप गरी अनुसन्धान गरिरहेको छ ।