नेकपा एमालेका महासचिव शंकर पोखरेलले स्थानीय तह निर्वाचनपछि एमाले नेपालको प्रमुख राजनीतिक शक्तिका रूपमा स्थापित भइसकेको जिकिर गरेका छन् ।

एमाले चितवन जिल्ला कमिटीद्वारा मंगलवार भरतपुरमा आयोजित जिल्लास्तरीय प्रशिक्षण कार्यक्रमलाई सम्बोधन गर्दै उनले पार्टी संघ र प्रदेशको निर्वाचनमा झन् सशक्त बन्ने दाबी गरे ।

उनले वामपन्थी आन्दोलनलाई बलियो बनाउन विभिन्न पार्टीमा रहेकालाई एमालेमा गोलबन्द हुन आह्वान गरे ।

पार्टीले देशव्यापी रूपमा संघ र प्रदेशको निर्वाचन केन्द्रित कार्यक्रम सञ्चालन गर्न थालेको उल्लेख गर्दै गाउँगाउँमा अभियान सञ्चालन गर्न कार्यकर्तालाई निर्देशन दिए ।