बेलायत पठाइदिन्छु भन्दै नगद १५ लाख रुपैयाँ ठगी गरेको अभियोगमा एक युवक पक्राउ परेका छन् । पक्राउ पर्नेमा इलामको इलाम नगरपालिका १ नारायणटार घर भई काठमाडौं महानगरपालिका–२९ सामाखुसी बस्ने ३७ वर्षीय प्रकाश राई रहेको प्रहरीले जनाएको छ । उनलाई आइतवार दिउँसो प्रहरीले पक्राउ गरेको हो । 

राईले ५ जनालाई सिजनल भिसामा बेलायत लैजाने भन्दै प्रतिव्यक्ति ३ लाखका दरले ठगी गरेको प्रहरीले जनाएको छ । उनले बेलायत जान प्रतिव्यक्ति ९ लाख रुपैयाँ लाग्ने र बेलायत पुगेपछि प्रतिष्ठित एग्रिकल्चर कम्पनीमा काम लगाइदिने भन्दै ठगी गरेको प्रहरीले जनाएको छ । प्रहरीका अनुसार उनले बेलायत पुगेपछि मासिक ४ लाख रुपैयाँसम्म तलब हुन्छ भनी प्रलोभनमा पारेर प्रतिव्यक्ति ३ लाख लिएर सम्पर्कविहीन भएका थिए । 

पीडितहरूको उजुरीका आधारमा काठमाडौं उपत्यका अपराध अनुसन्धान कार्यालयबाट खटिएको प्रहरीले राईलाई काठमाडौ सिनामंगल शम्भुमार्गबाट पक्राउ गरेको हो । उनलाई थप अनुसन्धान तथा कारबाहीको लागि वैदेशिक रोजगार विभाग बुद्धनगर काठमाडौं पठाइएको छ ।