राष्ट्रिय प्रजातन्त्र पार्टीले हिन्दू राष्ट्र पुनर्स्थापनाको अभियानलाई प्रभावकारी ढंगबाट अघि बढाउन आर्थिक सहयोग अभियान शुरू गरेको छ । स्वदेश तथा विदेशमा रहेका नेपालीको साथ, सहयोग र समर्थनको अपेक्षासहित राप्रपाले ‘हिन्दू राष्ट्रका लागि आर्थिक सहयोग अभियान’ शुरू गरेको हो । 

राप्रपा अध्यक्ष राजेन्द्र लिङ्देनले बिहीवार अभियानको औपचारिक शुरुआत गरेका छन् । पार्टीका महामन्त्री एवं आर्थिक स्रोत व्यवस्थापन एवं परिचालन समिति संयोजक डा.धवल शमशेर राणा नेतृत्वको समितिले प्रस्ताव गरेको कार्ययोजना अनुरुप लिङ्देनले अभियान शुरू गरेको राप्रपाले जनाएको छ । समितिले हिन्दू राष्ट्र सहयोगार्थ गोल्डेन प्रमाणपत्र मार्फत रु.५ हजार संकलन गर्ने भएको छ । 

पार्टीको संयन्त्र मार्फत हजारौँ प्रमाणपत्र वितरण गर्ने समितिले लक्ष्य लिएको संयोजक डा. राणाले बताए । औपचारिक शुरुआत भएको पहिलो दिनको समारोह मै रु. १२ लाख नगद र रु.एक करोडभन्दा बढीको प्रतिबद्धता घोषणा भएको समितिका सदस्य खुस्बु ओलीले जानकारी दिएकी छन् ।