नेकपा (एकीकृत समाजवादी)का अध्यक्ष माधवकुमार नेपालले एमाले अध्यक्ष केपी ओली आफू भन्दा १२ वर्षपछि केन्द्रीय सदस्य भएर पनि अहिले फूर्ति लगाइरहेको टिप्पणी गरेका छन् । 

शनिवार काठमाडौंमा आयोजित पार्टीको उपत्यका विशेष युवा जिल्ला भेलामा बोल्दै अध्यक्ष नेपालले एमाले अध्यक्ष ओलीबारे सकारात्मक कुरा गर्दै नगर्न पार्टीका नेता, कार्यकर्तालाई निर्देशनसमेत दिएका छन् । 

नेपालले भने, ‘को–अर्डिनेशन केन्द्र बनाउँदा २०३२ सालमा हामी ७ जना थियौँ । दुई जना पलायन भए । ३ जना हामी नेकपा एकीकृत समाजवादीमा छौँ, एकजना एमालेमा छन् । केपी ओली त त्यसबेला जेलमा थिए, १२ वर्षपछि हामीले केन्द्रीय कमिटीमा ल्याएका हौं, अहिले फूर्ति लाएर हुन्छ ?’

ओलीलाई २०३० सालमा रौतहटमा भेटेर आश्रय दिएको समेत नेपालले बताए । नेपालले आफ्ना पार्टीका नेता कार्यकर्तालाई एमालेमा जाने कल्पना समेत नगर्न भनेका छन् ।

‘अहिले पनि मसँग खबर आइरहेका छन । केपी ओलीसँग बस्न सकिँदैन भन्दै कतिपय मानिसहरूले सम्पर्क गरिरहेका छन । यही चुनावमा पनि हामी एकीकृत समाजवादीमा आएर चुनाव लडन चाहन्छौँ भनिरहेका छन’, नेपालले भने, ‘एमालेसँग जाने कल्पना नै गर्न सकिँदैन । जुन पार्टीले हाम्रो अस्तित्व स्वीकार गर्दैन । जसले हामीलाई अपराधी घोषणा गरेको छ । जसले हामीले देशद्रोही भनेको छ । त्यस्ता नेताप्रति कुनै किसिमले पोजेटिभ कुराको प्रचारप्रसार कसैले पनि नगर्नू होला । गर्नु हुन्छ भने कुरा बिग्रन्छ म क्लियर गर्न चाहन्छु ।’ 

उनले विचार मिल्ने, कुरा मिल्ने वामपन्थी दलहरूसँग एकतावद्ध भएर जाने प्रस्ताव आफ्नो पार्टीले अगाडि बढाएको तर तर एमालेसँग भने मिल्न सक्ने अवस्था नरहेको बताएका छन् । 

‘हामी गठबन्धन दलहरूसँग अहिले पनि हातेमालो गर्दै अघि बढने पक्षमा रहेका छौँ । हाम्रो पार्टीले वामपन्थी दलहरूलाई एकतावद्ध बनाउनका लागि हामीसँग कुरा मिल्ने, विचार मिल्नेहरूसँग एकतावद्ध हुनका लागि हामीले हात अगाडि बढाएका छौँ । हामी अरूसँग विलिन हुने होइन’, नेपालले भने, ‘हाम्रो विरोधीहरूले कुप्रचार गरिरहेका छन माओवादी केन्द्रमा विलिन हुने भनेर । त्यसमा कुनै सत्यता छैन । हाम्रो पार्टी विचारको आधारमा उभिएको छ । एमालेले जेसुकै बोलोस् । झुटको पुलिन्दा बाँडिरहेका छन । जनतामा भ्रम फैल्याउने कोसिस गरिरहेका छन । त्यो भ्रमलाई चिर्नुपर्छ ।’