उच्च अदालत जनकपुरले ‘कुमारी आमा’ निहारिका राजपूतका छोरा र बलात्कार आरोपी शिवराज श्रेष्ठको डीएनए परीक्षण गर्न आदेश दिएको छ । न्यायाधीश भोजराज अधिकारी र रेखा थापा पाण्डेको संयुक्त इजलासले बुधवार डीएनए परीक्षणको आदेश दिएको हो । 

निहारिकाले शिवराजले आफूलाई बलात्कार गरेको र सोही घटनाबाट छोरा जन्मिएको दाबी गर्दै आएकी छन् । उनले शुरू जिल्ला अदालत धनुषामा शिवराजविरुद्ध जबरजस्ती करणी मुद्दा दायर गरेकी थिइन् । धनुषा अदालतले आरोपित शिवराजलाई निर्दोष ठहर गर्दै सफाइ दिएपछि निहारिकाले उच्च अदालतमा पुनरावेदन गरेकी थिइन् । 

निहारिकाले छोराको डीएनए परीक्षण गर्द माग गर्दै काठमाडौंमा पटकपटक अनसनसमेत बसेकी थिइन् । उनले पछिल्लो हप्ता राष्ट्रपति कार्यालय शीतल निवास अगाडि आत्मदाहको प्रयाससमेत गरेकी थिइन् । प्रहरीले आरोपित शिवराज श्रेष्ठलाई यसअघि नै पक्राउ गरिसकेको थियो । हाल उनलाई अभद्र व्यवहारको मुद्दामा म्याद थप गरेर थुनामा राखिएको छ ।