अवैध संरचनाहरु हटाउँदै हिँडेका काठमाडौं महागरपालिकाका मेयर बालेन्द्र साह (बालेन) र नयाँबानेश्वरस्थित अल्फा बिटा कम्प्लेक्सका प्रतिनिधिबीच विवाद भएको छ । स्वीकृति पाएको भन्दा फरक प्रयोजनमा प्रयोग गरिएका संरचनाहरू हटाउने अभियान चलाइरहेका बालेन र अल्फाबेटाका प्रतिनिधिबीच बिहीवार विवाद भएको हो । 

अल्फाबिटाले भवनको अगाडिको भागमा सटर निकालेर फार्मेसी सञ्चालन गर्न दिएको विषयलाई लिएर विवाद भएको थियो । मेयर बालेनले घरको नक्सा खोजे । त्यहाँ उपस्थित अल्फाबिटाका प्रतिनिधिले उल्टो मेयरसँग नक्सा मागे । त्यसपछि मेयर बालेनले जंगिएर प्रश्न गरे, ‘तपाईंको घरको नक्सा मसित हुनुपर्छ ?’
त्यसपछि अल्फाबिटाका प्रतिनिधिले ‘नगरपालिकामा के हुन्छ त ?’ 

बालेनले पत्रिकामा निकालेको ३५ दिने सूचना देखाउँदै फेरि जंगिएर भने, ‘यहाँ यत्रो नोटिस दिएको छ, यो के हो ? ३५ दिनभित्र खाली गर भनेर नोटिस दिएको छैन ? तपाईंको घरको नक्सा मसँग हुन्छ कि तपाईंसँग ?’

त्यसपछि दुई पक्षबीच केही समय वादविवाद भएको थियो । अल्फाबिटाका प्रतिनिधिहरूले आफूहरूले राज्यलाई कर तिरिरहेको भन्दै करदाताको सम्मान गर्न बालेनसँग आग्रह गरेका थिए । बालेनले आफूले महानगरका सबैको घरघरमा गएर सूचना दिन नसक्ने भएकाले सार्वजनिक सूचना जारी गरेर अवैध संरचना हटाउन आग्रह गरेको बताएका थिए । 

मेयर बालेनले काठमाडौं महानगरपालिकाभिका अवैध संरचना र प्रयोजनविपरीत प्रयोग गरिएका संरचना हटाउने अभियान सञ्चालन गरिरहेका छन् । उनले फुटपाथमा राखिएका व्यापारलाई समेत हटाइरहेका छन् । 

मेयर बालेन बुधवारमात्र सुन्धारास्थित काठमाडौं मल, न्यूरोडको आरबी कम्प्लेक्सलगायतको अवैध संरचनामाथि डोजर चलाएका थिए । 

त्यस्तै काठमाडौं महानगरपालिकाले बुधवार साँझ कोटेश्वरका फुटपाथमा राखिएका व्यापार हटाएको थियो । अवैध संरचना हटाउन मेयर बालेन आफैँ फिल्डमा खटिएका छन् ।