झापाको विर्तामोड नगरपालिकाले सार्वजनिक स्थलमा फोहोर फाल्ने व्यक्तिलाई ५ हजार रुपैयाँ जरिबाना गरेको छ । सार्वजनिक स्थानमा फोहोर फाल्नेलाई  नगरपालिकाले जरिबाना गराएको हो । 

विर्तामोडको नयाँ बसपार्क प्रवेश गर्ने ठाउँ नजिकैको चिया बगान छेउमा फोहोर फाल्दै गरेको अवस्थामा मे १ च १९७० को पिकअपलाई बिर्तामोड नगर प्रहरीले नियन्त्रणमा लिएको थिए । गस्ती गर्ने क्रममा नगर प्रहरीले नियन्त्रणमा लिएका चालकलाई जरिबाना गरिएको विर्तामोड नगरपालिकाका प्रमुख प्रशासकीय अधिकृत विनोद कुमार न्यौपानेले बताए । उनले फोहोर फाल्नेलाई चेतावनी स्वरूप कारबाही गरिएको बताएका छन् । 

५ हजार जरिबाना तिरेपछि पिकअप चालकलाई छोडिएको थियो । 
यसअघि पनि एक टेम्पु चालकलाई नगरपालिकाले २ हजार जरिबाना गरेको थियो । तर, टेम्पु चालकलाई कारबाही गरेको सूचना भने नगरपालिकाले सार्वजनिक गरेको थिएन । जथाभाबी रूपमा फोहोर फाल्ने क्रम नरोकिएपछि कडाइ गर्न थालिएको नगरपालिकाले जनाएको छ ।