नेकपा एमालेका उपाध्यक्ष पोखरेलले आगामी मंसिर ४ गतेपछि पुन एमाले अध्यक्ष केपी ओलीको नेतृत्वमा सरकार बन्ने दाबी गरेका छन् । काठमाडौंमा शुक्रवार आयोजित एक कार्यक्रममा उनले आगामी निर्वाचनमा एमालेले बहुमत ल्याउने दाबी गरेका हुन् । उनले राष्ट्रिय विकास र समृद्धिको योजनामा पार्टी केन्द्रित हुने र नक्कली कुरा गरेर खेतका गह्रा–गह्रामा सुरुङ खन्ने काम नगर्ने बताए । 

वरिष्ठ उपाध्यक्ष पोखरेलले नक्कली कुरा गरेर सत्ता स्वार्थमा डुब्न नचाहने पनि बताए । रणनीतिक महत्वका सडकहरू केपी ओलीको नेतृत्वमा शुरु भएको भन्दै अहिलेको सरकारले किन कटौती गरेको भन्ने प्रश्न गरे । उनले मुलुकमा राजनीतिक स्थायित्व नभए आर्थिक विकास र समृद्धि हुन नसक्ने बताए । 

‘रणनीतिक महत्वका सडकहरू काम प्रारम्भ भएका थिए, कनि कटौती गरियो ? ३०० भन्दा धेरै अस्पताल बनाउने कुराको प्रारम्भलाई किन अवरुद्ध गरियो ? जयसिंह धामीलाई तुइन काटेर हत्या गरियो, गठबन्धन सरकार चुँसम्म बोल्न सकेन । चुच्चे नक्शा मेटाउने अपराधपूर्ण काम गर्ने जोसुकै होस् ती पात्रहरूलाई हामी कहिल्यै स्वीकार गर्न सक्दैनौँ’, पोखरेलले भने, ‘हामी केपी ओलीको नेतृत्वमा आगामी सरकार बनाउँछौँ । यो उद्घोष गरिसकेका छौँ । राष्ट्रिय विकास र समृद्धिको योजनामा केन्द्रित हुन्छौँ । छिमेकीसँग लडाइँ गर्ने भनेर नक्कली कुरा गरेर खेतका गह्रागह्रामा सुरुङ खन्दैनौँ । तर, छिमेकीसँग आँखामा आँखा जुधाएर कुरा गर्छौं । हामी नक्कली कुरा गरेर सत्ता स्वार्थमा डुब्न चाहँदैनौँ । नक्कली कुरा गर्ने, अन्तर्राष्ट्रिय जगतमा ठगी गर्दै हिँड्ने, राष्ट्रिय राजनीतिमा अपराध गर्नेहरुलाई कहिल्यै छुट दिने छैनौँ ।’