लहान नगर क्षेत्रभित्र केही दिन यतादेखि खानेपानीको मिटर चोर्नेको बिगीबिगी बढ्न थालेको छ ।    गत बुधवार बिहान ४ बजेतिर लहान नगरपालिका–६ राधाकृष्ण चोकस्थित सहिजा खातुन, दिनेश साह र रामबाबु दासको घरकोे धाराको मिटर चोरी भएपछि उनीहरू गुनासो गर्न नेपाल खानेपानी संस्थान लहान शाखामा आएपछि यो कुरा बाहिर आएको शाखाका निमित्त प्रमुख सूर्यनारायण चौधरीले जानकारी दिए । 

विगत केही दिनदेखि यो घटना बढ्दै आएको र राधाकृष्ण चोकको एक घरको सिसी टिभीको फुटेज हेर्दा मिटर चोरी गर्ने व्यक्तिले शिरदेखि पाउँसम्म कालो कपडाले पूरै बेरिएर मिटर चोरी गरेको देखिएको छ । उक्त व्यक्तिको पहिचान हुन नसकेपछि खानेपानीमा निवेदन दिन गएको स्थानीयवासीले बताएका छन् ।

उक्त शाखामा केही दिन यतादेखि चोरी भएको मिटरका लागि गुनासो लिएर आउनेको संख्या ३५ पुगेको छ । संस्थानमा आएको निवेदनमध्ये वडा नं ५ र ६ बाट मिटरका लागि बढी मात्रामा निवेदन आउने गरेकाले सो क्षेत्रबाट बढी मात्रामा मिटर चोरी भएको सो संस्थानका वितरण शाखा प्रमुख लट्टु यादवले  बताए । केही समय अगाडि खानेपानीको धारामा लगाइको पित्तलको धारोको पनि  चोरी हुन थालेको थियो । 

अहिले धाराको टुटी मात्र नभएर मिटर नै चोरी हुन थालेपछि यहाँ आउने ग्राहकलाई इलाका प्रहरी कार्यालयमा निवेदन दिन आग्रह गरिएको यादवले जानकारी दिए । खानेपानीको नयाँ मिटर किन्दा एक हजार ६०० भन्दा बढी लाग्ने र तर चोरी गरेको मिटर सस्तो दाममा बेचेर लागुऔषध सेवनकर्ताले यस्तो गरेको हुनसक्ने स्थानीय एक व्यक्तिले बताए । रासस