युवा तथा खेलकुद मन्त्री महेश्वर गहतराज (अथक) ले विदेशमा रहेका नेपालीहरूलाई समेत राष्ट्रिय टिममा समावेश गर्ने आधार तयार हुँदै गएको बताएका छन् । शुक्रवारदेखि काठमाडौंमा शुरू भएको प्रथम एनआरएन राष्ट्रिय कराँते प्रतियोगिताको उद्घाटन गर्दै मन्त्री अथकले गैरआवासीय नेपालीहरूलाई आर्थिक र सांस्कृतिक अधिकारसहितको नागरिकता प्रदान गर्ने तयारी भइरहेको जानकारी दिँदै आगामी दिनमा नेपाली राष्ट्रिय टिममा एनआरएनका खेलाडीहरू समावेश हुन सक्ने वातावरण बन्दै गएको बताए । 

विविध कारणले विदेशी भूमिमा रहेका नेपालीहरूबीच खेलकुदको माध्यमबाट आपसी सद्भाव र भाइचारा कायम गर्न प्रयास भइरहेको तथ्य प्रथम एनआरएन राष्ट्रिय कराँते प्रतियोगिताले पुष्टि गरेको उल्लेख गर्दै मन्त्री अथकले एनआरएनका नयाँ पुस्ताहरूलाई समेत खेलकुदका माध्यमबाट नेपालसँग जोड्ने अभियान शुरू गर्नुपर्ने बताए । 

आसन्न नवौं राष्ट्रिय खेलकुद प्रतियोगितामा एनआरएनलाई समेत समावेश गर्ने गरी प्रक्रिया अगाडि बढाइएकाले त्यसको सदुपयोग गर्नसमेत मन्त्री अथकले आग्रह गरे ।