नेकपा एमालेका उपाध्यक्ष तथा पूर्वअर्थमन्त्री सुरेन्द्र पाण्डेले नेपालले चीन सरकारले दिने ‘बेल्ट एण्ड रोड इनिसिएटिभ’ (बीआरआई) सहयोगको ठूलो अपेक्षा गर्न नहुने बताएका छन् । शुक्रवार काठमाडौंमा भएको एक अन्तरक्रिया कार्यक्रममा बोल्दै उनले चीनले नेपालबाट आफ्नो देशमा कुनै किसिमको हस्तक्षेप नहोस् भनेर बीआरआई सहयोग गर्ने नीति लिएको दाबी गरे । उनले नेपालले चीन सरकारले दिने बीआरआई सहयोगको ठूलो अपेक्षा गर्न नहुने बताए । 

बीआरआई परियोजना चीनको आक्रामक योजना नभएर सामान्य मात्रै रहेको पाण्डेको भनाइ थियो । पूर्वअर्थमन्त्री पाण्डेले नेपाल चीनको मोनविज्ञान बुझेर मात्रै अगाडि बढ्नुपर्ने उल्लेख गरे । उनले नेपाल सरकारले अमेरिकी सहयोग एमसीसी पास गरेर ठीक गरेको बताए । 

पाण्डेले नेपालमा अमेरिकी सहयोग एमसीसी आउँदा चीनलाई चिन्ता भएर चासो उठाएको भन्दै नेपालमा अमेरिकाको उपस्थिति धेरै भयो भने चीन मात्रै नभएर भारत पनि रिसाउने अवस्था आउने बताए । उनले भारतले नै नेपाललाई धेरै सहयोग आउन दिने अवस्था नभएको भन्दै विदेशी राष्ट्रहरूको स्वार्थलाई बुझेर मात्रै वैदेशिक लगानी सम्बन्धी नीति बनाउनुपर्ने बताए । 

‘अमेरिकी सहयोग एमसीसी लिएर ठीक गरेका छौँ । एमसीसी आउँदा चीनको चिन्ता चासो उठाएको होला । नेपालमा अमेरिकाको उपस्थिति धेरै भयो भने चीन मात्रै नभएर भारत पनि रिसाउँछ । भारतले नै नेपाललाई धेरै सयोग आउन दिँदैन । त्यसकारण नेपाली यो सेन्सेटिभिटीलाई हेरेर वैदेशिक लगानीसम्बन्धी नीति बनाउनुपर्छ’, उनले भने,  ‘विश्वका मुलुकहरू अन्य स्वास्र्थमा हिँडेका होलान् तर नेपालले आफ्नो स्वार्थको लागि सबैसँग वैदेशिक सहयोग लिनुपर्छ । हरेक देशहरूको विकासका नीतिहरुमा क्रूसियल फ्याक्टरहरू हुन्छन । जुन कुरालाई देशको नेतृत्वले समाउन सक्यो त्यो देश बन्छ । समाउन नसक्ने देशहरु पछाडि जान्छन् ।’

पाण्डेले नेपालले भारतसँगको व्यापार नीति परिर्वतन गर्न नसके कहिल्यै पनि अगाडि बढ्न नसक्ने बताए । उनले देशको नेतृत्वले वास्तविक अन्तर्राष्ट्रिय कूटनीतिलाई बुझ्न नसके अब नेतृत्वमा आउने नयाँले समेत दुःख पाउने बताए ।