प्रहरी महानिरीक्षक धिरजप्रताप सिंहले नेपालमा आत्महत्या सम्बन्धित तथ्यांक दिन-प्रतिदिन बढ्दै गइरहेको भन्दै चिन्ता व्यक्त गरेका छन् । आइतवार काठमाडौंमा आयोजित आत्महत्या रोकथाम तथा न्यूनीकरणसम्बन्धी सचेतना कार्यक्रमलाई सम्बोधन गर्दै उनले कोरोना महामारीकै  हाराहारीमा आत्महत्याका कारण ज्यान गुमेको बताए ।

आर्थिक वर्ष २०७७/०७८ मा कोभिडको बेलामा ९ हजार ४०९ जनालाई कोभिडका कारणले गुमाएको, तर सोही अवधिमा ७ हजार १४१ जनाले आत्महत्या गरेको बताए । । उहाँले कोरानाले आक्रान्त बनाएको बेलामा कोभिडका कारण भन्दापनि आत्महत्याका कारण ज्यान गुमाउनेको संख्या धेरै भएको बताए । 

‘नेपालमा आत्महत्या सम्बन्धित तथ्यांक उत्साहजनक छैन । आत्महत्याको संख्या निरन्तर बढिरहेको छ । आर्थिक वर्ष २०७७/०७८ मा कोभिडको बेलामा ९ हजार ४०९ जनालाई कोभिडका कारणले गुमायौँ । त्यसैवर्ष ७ हजार १४१ जनाले आत्महत्या गरे । कोरानाले आक्रान्त बनाएको बेलामा कोभिडका कारण भन्दा पनि आत्महत्याका कारण ज्यान गुमाउनेको संख्या धेरै भयो’, उनले भने । 

कार्यक्रममा महान्यायाधिवक्ता खम्मबहादुर खातीले नेपालमा आत्महत्या गर्नेहरूको संख्या दिनप्रतिदिन बढ्दै गएको उल्लेख गर्दै समस्या समाधानको पहिचान गर्न आवश्यक रहेको बताए । उनले समाजका घटनालाई नजिकबाट नियाल्न र समाजमा फैलिरहेका विकृति, विसंगतितर्फ राज्यको ध्यान जान आवश्यक भएको बताए । 

‘नेपाल आत्महत्या गर्ने १२६औँ स्थानमा रहेको देखाएको छ । यो दिनानुदिन बढ्दो अवस्थामा छ । यसलाई पहिचान गर्न आवश्यक छ । समाजका घटनालाई नजिकबाट नियाल्न आवश्यक छ । समाजमा फैलिरहेका विकृति, विसंगतितर्फ राज्यको ध्यान जान आवश्यक छ’, उनले भने, ‘आत्महत्या घटाउने कार्ययोजना हामीले बनाउनु आवश्यक छ । यसको लागि सचेतना कार्यक्रम गर्न आवश्यक छ । यसको कारण गरिबी पनि एउटा कारण हुनसक्छ ।’