बैंक तथा वित्तीय संस्थाहरूले १ असोज बढाएको ब्याजदरमा निजी क्षेत्रले असन्तुष्टि व्यक्त गरेको छ । निजी क्षेत्रको छाता संगठन नेपाल उद्योग वाणिज्य महासंघले बैंकहरूले गरेको ब्याजदर वृद्धिले महंगी बढाउने, अर्थतन्त्रमा संकट नित्याउन सक्ने र अर्थतन्त्र संकुचित भएर राजस्वमा समेत २० प्रतिशतले कमी आउने भन्दै ब्याजदर वृद्धिको निर्णय तत्काल फिर्ता लिन आग्रह गरेको हो । 

महासंघले बुधवार एक प्रेस विज्ञप्ति निकाल्दै आफ्नो धारणा सार्वजनिक गरेको छ । महासंघले बैंकहरूको ब्याजदर बढाउने निर्णयप्रति गम्भीर ध्यानाकर्षण भएको उल्लेख गरेको छ । 

 यसले कर्जाको ब्याजदर आकासिने हुँदा कोभिड महामारी र त्यसपछि बाह्य र वित्तीय क्षेत्र असन्तुलनका कारण प्रभावित उद्यमी व्यवसायी मर्माहत भएको विज्ञप्तिमा उल्लेख छ । महासंघले ब्याजदर वृद्धिको निर्णय फिर्ता गराउने विषयमा सरकार, केन्द्रीय बैंक र बैंक तथा वित्तीय संस्थाहरूको ध्यानाकर्षण गराएको पनि उल्लेख छ । 

ब्याजदर वृद्धिले लागत बढेका कारण साना तथा मझौला उद्यम बन्द गर्नुपर्ने अवस्था आएको महासंघको गुनासो छ । यसले उत्पादित सामानको मूल्य अकासिएर आम सर्वसाधारणको जीविका पनि कष्टकर हुँदै गएको महासंघले उल्लेख गरेको छ ।

आठ प्रतिशतभन्दा माथि पुगिसकेको मुद्रास्फीति दरलाई बैंक वित्तीय संस्थाहरूको यस निर्णयले थप माथि लग्ने र अर्थतन्त्र सुंकचित हुँदै जाँदा सरकारको राजस्व संकलन समेत करीब २० प्रतिशतले न्यून हुन गएको दाबी महासंघको छ ।

महासंघले जारी गरेको विज्ञप्ति अनुसार संकटको बेलामा जोखिम बाँडेर अर्थतन्त्रका सबै क्षेत्रले एक अर्कालाई सहयोग गर्नुपर्ने समेत उल्लेख छ ।

अर्थतन्त्रमा नकारात्मक असर मात्र पर्ने ब्याजदर वृद्धिको निर्णय तत्काल स्थगन गर्न महासंघले सम्पूर्ण सबै सरोकारवालासँग आग्रह गरेको छ ।