घरायसी विवादको कारण सुनसरीको इटहरीमा ज्वाइँले जेठानको हत्या गरेका छन् । ४३ वर्षीय रामकुमार भुजेलले इटहरी ५ सिमरवनाका ३८ वर्षीय भुवने चौधरीको हत्या गरेको सुनसरी प्रहरीले जनाएको छ । 
उनीहरू नातामा ज्वाइँ जेठान पर्छन् । इटहरी ६ का २७ वर्षीय वेदप्रकाश मण्डलसँग मिलेर धारिलो हतियार प्रहार गरी शनिवार हत्या गरेको सुनसरी प्रहरीले जनाएको छ । 

भुजेल र मण्डलले चौधरीलाई इटहरी ६ नेशनल गल्ली प्रवेश गर्ने स्थानमा धारिलो हतियार प्रहार गरेका थिए । हतियार प्रहारबाट गम्भीर घाइते भएका चौधरीको उपचारको क्रममा धरानस्थित बिपी कोइराला विज्ञान प्रतिष्ठानमा शनिवार मृत्यु भएको थियो ।

मृतक सिटी चालक हुन् । चौधरीलाई धारिलो हतियार प्रहार गरेर गम्भीर घाइते बनाएपछि मण्डलको सिटी सफारी चढेर भुजेल विराटनगर हुँदै भारतको जोगबनीतिर गइरहेका बेला पक्राउ परेको सुनसरी प्रहरी प्रमुख एसपी प्रभु ढकालले बताए ।

प्रहरीले अभियुक्त भगाउन प्रयोग गरिएको को २ ह २०९९ नम्बरको अटो रिक्सा पनि बरामद गरेको छ । 

भुवने चौधरीको हत्या हुनुभन्दा अघिल्लो दिन रामकुमार भुजेलसँग विवाद भएको थियो । रामकुमार परस्त्रीसँग लागेको भुवनले थाहा पाएका थिए । यसरी परस्त्रीसँग लाग्दा घर व्यवहार बिग्रिने भन्दै भुवनले ज्वाइँ रामकुमारलाई सम्झाई–बुझाई गरेका थिए । 

‘श्रीमतीको अगाडि आफूलाई बदनाम गरेको भन्दै रामकुमारले इख राखेका रहेछन् । भोलिपल्ट शनिवार धारिलो हतियार बोकी जेठानको हत्या गर्ने भन्दै हिँडेका रहेछन् । इटहरी ६ नेशनल गल्लीमा चौधरी सिटी बसेको देखेपछि खुकुरी प्रहार गरी हत्या गरेको खुलेको छ’, उनले भने । 

रामकुमारले खुकुरी प्रहार गरेपछि वेदप्रकाशको सिटीमा चढेर विराटनगरतर्फ लागेको देखिएको छ । हत्यामा प्रयोग गरिएको धारिलो हतियार दुहबीको बुढी खोलामा फालेको खुलेको छ । हत्या आरोपमा पक्राउ परेका दुवै जनालाई इलाका प्रहरी कार्यालय इटहरीले सुनसरी अदालतमा कर्तव्य ज्यान मुद्दामा पाँच दिनको म्याद थप गरी अनुसन्धान शुरु गरेको प्रहरीले जनाएको छ ।