महजोडी अर्थात हरिवंश आचार्य र मदनकृष्ण श्रेष्ठ अभिनित फिल्म ‘महापुरूष’ कात्तिक ११ गतेदेखि देशव्यापी प्रदर्शनमा आउँदैछ । प्रदीप भट्टराई लिखित एवं निर्देशित फिल्ममा हरिवंशले दुई छोराको एकल बुबाको भूमिका निर्वाह गरेका छन्, जसले बुढेसकालमा विवाह गर्न लागेका छन् । फिल्मको ट्रेलरमा उक्त कुरा प्रस्तुत गरिएको छ । 

टे«लर हेरेपछि कतिपयले फिल्म हरिवंशको वास्तविक जीवनसँग नै मेल खानेसमेत अड्कलबाजी गरिरहेका छन् । तर, हरिवंशले फिल्मको कथा आफ्नो जीवनसँग मेल नखाने प्रष्टयाएका छन् । मंगलवार फिल्मबारे जानकारी दिन आयोजित पत्रकार सम्मेलनमा उनले भने, ‘आफ्नो श्रीमतीको निधन भएपछि अर्काे विवाह गर्न चाहने कथा फिल्ममा देखाइएको छ । उमेर ढल्केपछि आफूले विवाह गरेको भाग मात्र फिल्मसँग मेल खान्छ । अरु कुराहरू वास्तविक जीवनभन्दा फरक छ ।’ अहिले सोँच्दा आफूले विवाह नगरेको भए पछुतो लाग्ने रहेछ भन्ने महसुस हुने कुरा हरिवंशले बताए । 

‘सबैकुरा विचार गरेपछि विवाह गर्ने निर्णय गरेँ । मेरो छोराहरूले पनि निर्णय गरे’, उनले भने, ‘विवाह नगरेको भए पछुतो हुने रहेछ भन्ने लाग्छ अहिले ।’ उनले विवाहपछि जीवन सहज भएको बताए । हरिवंशले अगाडि भने, ‘विवाह गरेपछि मेरो जीवन एकदमै सहज भयो । र, म काममा फर्किन सकेँ । मेरो छोराहरूले आमा पाए, मैले जीवनसाथी पाएँ । त्यस्तो घटना सबैभन्दा ठूलो दुर्भाग्य हो । तर, अहिले जीवन सजिलो भएको देखेर ठीकै काम गरेको रहेछु भन्ने लागेको छ ।’ पत्नी वियोगपछि हरिवंशले १० वर्षअघि ५२ वर्षको उमेरमा दोस्रो विवाह गरेका थिए । 

भाइटीकाको भोलिपल्टदेखि प्रदर्शनमा आउने ‘महापुरूष’मा मदनकृष्ण र हरिवंशसँगै गौरी मल्ल, रविन्द्र सिंह बानियाँ, अरुण क्षेत्री, अन्जना बराइली, राजाराम पौडेललगायतको अभिनय छ । म्याक्स दिपेश खत्री निर्माता रहेको फिल्मको कार्यकारी निर्माता रविन्द्र सिंह बानियाँ हुन् । फिल्मले दर्शकको मन जित्ने अपेक्षा गरिएको छ ।