नेपालीहरूको महान पर्व दीपावलीको तेस्रो दिन आज कुकुर तिहार मनाइएको छ । आज घर–घरमा धर्मराज वाहन कुकुरलाई पूजा गरी कुकुर तिहार मनाइएको हो । 

कार्तिक कृष्ण चतुर्दशीका दिन कुकुरलाई मीठा-मीठा परिकार खान दिए यमराजको ढोकामा द्वारपालका रुपमा बस्ने श्याम र सबल नामका कुकुरले यमलोक जाँदा बाटो छोडिदिने धार्मिक विश्वासका आधारमा कुकुर तिहार मनाउने गरिन्छ । वैवस्वत मन्वन्तरको कुलमा जन्मिएको कुकुरले धर्मराज युधिष्ठिरलाई स्वर्ग यात्रामासमेत साथ दिएको धार्मिक विश्वास छ ।

वैवस्वत मन्वन्तर कुलमा जन्मिएको कुकुर अहिले लोकप्रिय घरपालुवा जनावरका रूपमासमेत स्थापित भएको छ । कुकुरलाई आज्ञापालक र सुरक्षामा भरपर्दो घरपालुवा जनावरका रुपमा लिइन्छ । 

आजकै दिन नेपाल प्रहरी केनाइन महाशाखा (कुकुर तालिम केन्द्र) ले कुकुरको पूजाआजा सम्पन्न गरेको छ । प्रहरी अनुसन्धानमा कुकुरको भूमिका निकै महत्वपूर्ण मानिने गरिएको छ । विभिन्न प्रकारका जटिल अनुसन्धानमा पनि कुकुरलाई समावेश गराउने गरिएको छ । 

महाशाखाले कुकुरको सम्मानमा आजको दिनमा विभिन्न प्रकारका खेल खेलाएर तथा खानपान गराइ पूजा गरेको हो । कुनै ठाउँमा बमलगायतका शंकास्पद वस्तुहरू भेटेमा पहिलो अनुसन्धानमा नै कुकुरको प्रयोग हुन्छ । आफूहरूलाई सघाउने कुकुरहरूको पूजा गर्न पाउँदा खुशी लागेको प्रहरी अधिकृतहरूले बताए । 

महाशाखाका कुकुरहरूले हातहतियार तथा विष्फोटक पदार्थ, लागुऔषध, खोजी तथा उद्धार र ट्रयाकको अनुसन्धान गर्ने काम गरिरहेको छ । नेपाल प्रहरीसँग अनुसन्धानमा सघाउने ८ प्रजातिका कुकुरहरू रहेको बताइएको छ । त्यस्तै, आजै साँझ ऐश्वर्य, धनधान्य र सम्पन्नताकी देवी लक्ष्मीको पूजाआराधना गरी श्रद्धा भक्तिपूर्वक लक्ष्मीपूजा पनि गरिँदैछ । यो पटक कुकुर तिहार र लक्ष्मीपूजा एकैदिन परेको छ ।