वामपन्थी नेता तथा रुपन्देही–१ बाट सत्तारूढ गठबन्धनको समर्थनमा स्वतन्त्र उम्मेदवारी दिएका घनश्याम भुसालले एमालेका अध्यक्ष केपी शर्मा ओलीलाई ‘वनमारा झार’ को संज्ञा दिएका छन् । देशको संवैधानिक फूलहरूको बगैचामाथि बनमारा झारले आक्रमण गरेको भनी उनले टिप्पणी गरे ।

भुसालले भने, ‘ओली साँच्चिकै वनमार झार रहेछन्, अन्ततः उनले आफ्नो चरित्र देखाई छाडे । वनमाराले आफ्नो अस्तित्व समेत संकटमा पार्ने गरी बगैचा उजाड बनाउने कोसिस गर्‍यो ।’

शुक्रवार जिल्लाको धकधई क्षेत्रका मतदाताहरूसँग कुरा गर्दै भुसालले नेकपा एमालेमा रहेका अधिकांश नेता कार्यकर्ताहरू इमानदार रहे पनि नेतृत्वले गलत गरेको तर्क गरे । ओलीले एमालेको पार्टी प्रणाली मात्रै नभएर लोकतन्त्र र देशको संवैधानिक व्यवस्थामाथि नै प्रहार गरेर वनमार झारको चरित्र देखाएको भुसालको भनाइ छ ।

कमल थापाहरू सूर्य चिन्हबाट चुनाव लडेकोतर्फ संकेत गर्दै भुसालले प्रश्न गरे, ‘पन्चहरूले एमालेको चिन्ह लिएर लड्ने तर पार्टीमा वर्षौंसम्म काम गरेका नेताहरूले टिकटका लागि माफी माग्नुपर्ने ? यस्तो पनि हुन्छ ?’ 

आफूले साढे ४ दशक पसिना बगाएको पार्टीबाट विद्रोह गरेको उल्लेख गर्दै उनले इमानदार एमाले कार्यकर्ताहरूले आफूलाई साथ दिने बताए ।